ԼՂՀ վարչապետ Արա Հարությունյանի մոտ այսօր հրավիրված խորհրդակցությունում քննարկվել են հանրապետությունում կրկին բռնկված աֆրիկյան ժանտախտի կանխարգելման մեխանիզմներն ու հետագայում խոզաբուծության զարգացման հետ կապված առաջարկվող հարցերը:

Հիվանդության առաջացման պատճառների և առկա օջախների վերաբերյալ  գյուղնախարարի հաղորդման համաձայն` հանրապետության մեկ տասնյակից ավելի  համայնքներում արձանագրվել են աֆրիկյան ժանտախտի դեպքեր: Վարակի կանխման ուղղությամբ շրջաններում ոստիկանության և փրկարար ծառայության աշխատակիցների հետ համապատասխան բաժինների կողմից կատարված աշխատանքների մասին տեղեկատվություն ներկայացրին շրջվարչակազմերի ղեկավարները:

Միջոցառումներն ավելի արդյունավետ կազմակերպելու համար առաջարկվեց  համայնքներում հաշվառել վարակված անասունների գլխաքանակը, և կենտրոնացված ձևով իրականացնել անարյուն եղանակով ոչնչացումներ:

Անհրաժեշտ համարվեց համայնքներում ստեղծել անասնագերեզմանոցներ, իսկ մյուս  անասուններն առնել փակ պահվածքի տակ: Վարչապետը հրահանգեց բնակիչների շրջանում համապատասխան բացատրական աշխատանքներ տանել, իսկ առաջարկվող պայմաններին չենթարկվող խոզաբույծների նկատմամբ կիրառել պատժամիջոցներ: Ա. Հարությունյանը հանձնարարեց նաև օրենսդրական կարգավորում տալ տնտեսության կարևոր այս ճյուղի հետագա զարգացմանը խոչընդոտող հիմնախնդիրներին:

Խորհրդկացությանը մասնակցում էին ԼՂՀ գլխավոր դատախազ Ա. Ղարամյանը, փոխվարչապետ Ա. Աղաբեկյանը, պաշտոնատար այլ անձինք:

ԼՂՀ կառավարության տեղեկատվության և
հասարակայնության հետ կապերի բաժին