«Ղարաբաղյան հակամարտության խաղաղ կարգավորման հասնելու համար ամեն կերպ աջակցելու եմ հակամարտող կողմերին»,- ԱՄՆ-ում լույս տեսնող «Ասպարեզ» պարբերականի փոխանցմամբ` օրերս նման հայտարարություն է արել ԱՄՆ-ի նորընտիր պետքարտուղար Ջոն Քերին` Սենատում իր թեկնածության հաստատման շուրջ լսումների ժամանակ պատասխանելով Ռոբերտ Մենենդեսի եւ Բարբարա Բոքսերի հարցերին: 

«Որպես ԵԱՀԿ Մինսկի խմբի համանախագահող երկիր` ԱՄՆ-ն կշարունակի իր ջանքերն ուղղված հակամարտության կարգավորմանը` միեւնույն ժամանակ դատապարտելով տարածաշրջանում լարվածություն առաջացնող ցանկացած գործողություն»,- ասել է Քերին: Անդրադառնալով Ստեփանակերտի օդանավակայանից թռիչքներ իրականացնելու դեպքում քաղաքացիական ինքնաթիռները ոչնչացնելու վերաբերյալ Ադրբեջանի սպառնալիքների մասին հարցին` Քերին ընդգծել է, որ հակամարտությունը պետք է կարգավորվի դիվանագիտական ճանապարհով: