Հայաստանի ոստիկանության ձերբակալվածներին պահելու վայրերը (ՁՊՎ) ազգային օրենսդրության և մարդու իրավունքների միջազգային չափորոշիչներին համապատասխանեցնելու ջանքերն առաջ են ընթանում, սակայն ազգային օրենսդրական դաշտի և պրակտիկայի հետագա բարելավման անհրաժեշտություն կա` ըստ ԵԱՀԿ աջակցությամբ այսօր հրապարակված զեկույցի:

Զեկույցը ներկայացնում է ոստիկանական ՁՊՎ-ներում 2010 թ. հասարարական մոնիտորինգի արդյունքները` իրականացված ՀՀ ոստիկանության պետի 2006 թ. հրամանով ստեղծված դիտորդական խմբի կողմից: Զեկույցը գնահատում է պահման և սանիտարական պայմանները, բժշկական ծառայությունները և արտաքին աշխարհի հետ հաղորդակցվելու իրավունքի իրականացման հնարավորությունը:

«Պետական ​​ համակարգի հասարակական մոնիտորինգը երաշխավորում է ավելի բարձր թափանցիկություն և հաշվետվողականություն: Մենք ողջունում ենք ոստիկանության և քաղաքացիական հասարակության շարունակական համագործակցությունը դիտորդական խմբի գործունեության միջոցով և հավատացած ենք, որ զեկույցում ամփոփված առաջարկությունները կծառայեն որպես տեղեկատվության աղբյուր և կոգևորեն կառավարությանը` համակարգը բարելավելու ջանքերում»,- ասաց ԵԱՀԿ երևանյան գրասենյակի մարդու իրավունքների պատասխանատու Վլադիմիր Չունտուլովը:

Տասը հասարակական կազմակերպություն ներկայացնող խումբը ուրվագծեց խնդիրները և նշեց որոշ բարելավումներ, ինչպես, օրինակ` ոստիկանության որոշ ՁՊՎ-ների վերանորոգման և ջեռուցման աշխատանքներում: Այն նաև առաջարկեց անդրադառնալ այնպիսի խնդիրների, ինչպիսիք են կադրերի պակասը, ինչը կարող է հանգեցնել ձերբակալված անձանց իրավունքների խախտման:

Տեղերում բուժաշխատողների բացակայությունը, անբավարար սնունդը և վիճակը` խոնավության, օդափոխության և լուսավորության առումով, նույնպես ներկայացված խնդիրների շարքում էին:

Բացի դրանից` խումբը խորհուրդ է տալիս ներկայիս 33 ՁՊՎ-ի փոխարեն կառուցել 13 նորակառույց ՁՊՎ` միջազգային չափորոշիչներին համապատասխան:

Զեկույցի եզրակացությունները քննարկեցին ներկայացուցիչներ ՀՀ ոստիկանությունից, Ազգային ժողովից, քաղաքացիական հասարակության կազմակերպություններից և Մարդու իրավունքների պաշտպանի գրասենյակից` նշանակված որպես Ազգային կանխարգելիչ մեխանիզմ ՄԱԿ-ի Խոշտանգումների դեմ կոնվենցիայի կամընտիր արձանագրության (OPCAT) շրջանակներում:

Զեկույցը պատրաստվել և հրատարակվել է Բաց հասարակության հիմնադրամներ-Հայաստան և Գործընկերություն հանուն բաց հասարակության նախաձեռնության աջակցությամբ: