Ամերիկաբնակ գյումրեցի Կարեն Եսայանի սպանության մեջ մեղադրվող Հարություն Սարգսյանի գործով դատական երկրորդ նիստը սկսվեց նշանակվածից մոտ 2 ժամ ուշացումով: Ժամը 12-ին նշանակված դատական նիստին ներկա էին միայն ամբաստանյալը, մեղադրող կողմից Շիրակի մարզի դատախազության դատախազ Սալոյանը և լրատվամիջոցների ներկայացուցիչները:

Հայտարարվեց կես ժամ ընդմիջում: Այդ ընթացքում հասցրին ներկայանալ միայն ամբաստանյալի շահերը պաշտպանող փաստաբանների եռյակը և դատակոչված վկաների մի մասը: Հաջորդ կեսժամյա ընդմիջման ընթացքում դատարան ներկայացավ նաև տուժողի իրավահաջորդ Անահիտ Իսկանդարյանը և միայն 13:30-ին Երևանից Գյումրի հասան մեղադրող դատախազ Մարուխյանը, փաստաբան Վարդուհի Էլբակյանը և Արմեն Մելքոնյանը:

Դատական նիստի հենց սկզբում տուժողի ներկայացուցիչ Արմեն Մելքոնյանն ասաց, որ հարց ունի ուղղված ամբաստանյալին, և քանի որ վերջինիս փաստաբանները ներկա են, ապա ցանկանում է տալ նախորդ նիստին հնչեցրած հարցը, որին Հարություն Սարգսյանը չէր պատասխանել՝ պատճառաբանելով, որ պաշտպանական կողմը բացակայում է:

«Դուք ծառայե՞լ եք բանակում»,- հարց ուղղեց ամբաստանյալին Արմեն Մելքոնյանը: «Գործում կա տեղեկանք դրա վերաբերյալ, կարող եք ծանոթանալ: Իսկ ես, օգտվելով դատավարական իմ իրավունքից, հրաժարվում եմ պատասխանել»,- նշեց Հարություն Սարգսյանը: «Ֆիզիկապես առո՞ղջ եք»,- շարունակեց հարցապնդումը Մելքոնյանը: «Այդ մասին ևս կա գործում, և ես այս հարցին ևս հրաժարվում եմ պատասխանել»,-հայտարարեց ամբաստանյալը:

Այնուհետև Հարություն Սարգսյանի պաշտպան Լուսինե Սահակյանը միջնորդություն ներկայացրեց՝ իր վստահորդի նկատմամբ որպես խափանման միջոց կիրառած կալանավորումը վերացնելու վերաբերյալ: «Հարություն Սարգսյանը անազատության մեջ է գտնվում շուրջ 10 ամիս,- նշեց փաստաբանը:- Համարում եմ, որ իմ վստահորդը անազատության մեջ է գտնվում ապօրինի՝ առանց դատարանի կայացրած պատշաճ որոշման»:

Ըստ փաստաբանի՝ դատարանը չի նշել, թե ինչ ժամկետ է ընտրվել կալանքի համար: Մինչդատական կալանքի հարցը ևս չի քննվել: «Շիրակի մարզի ընդհանուր իրավասության դատարանը պարտավոր էր քննության առնել հարցը, երբ ավարտվել էր նախաքնությունն, ու գործը մտել էր դատարան, և ուրեմն լրացել էր անձին անազատության մեջ պահելու ժամկետը: Չի քննարկվել նաև այն հարցը, թե պե՞տք է երկարաձգել անազատության մեջ պահելու որոշումը, թե՞ ոչ»,- հայտարարեց Լուսինե Սահակյանը:

Վկայակոչելով Մարդու իրավունքների եվրոպական կոնվեցիայի 5-րդ հոդվածը, ՀՀ Սահմանադրության 16-րդ հոդվածը, քրեական դատավարության 131-րդ հոդվածը՝ փաստաբանը միջնորդեց Հարություն Սարգսյանին ազատ արձակել կալանքից:

Պաշտպանական կողմը դեմ հանդես եկավ պաշտպանական կողմի միջնորդությանը, իսկ դատավոր Մարտին Սարոյանը որոշում կայացնելու համար անհայտ ժամանակով հեռացավ խորհրդակցական սենյակ:

Ժամը 16:30-ին վերադառնալով նիստերի դահլիճ՝ նիստը նախագահող դատավորը հրապարակեց որոշումը, որով մերժում էր փաստաբան Լուսինե Սահակյանի ներկայացրած միջնորդությունը: Մերժումը դատավորը հիմնավորեց նրանով, որ ամբաստանյալին առաջադրված 104 հոդվածի 1-ին մասը ծանր հոդված է, և իրենք ծանր հանցագործության մեջ մեղադրվող անձին չեն կարող թողնել ազատության մեջ, բացի դրանից էլ վստահ չեն, որ անազատության մեջ հայտնվելուց հետո Հարություն Սարգսյանը չի թաքնվի արդարադատությունից և չի խոչընդոտի դատավարական գործընթացին:

Ամբաստանյալի փաստաբաններից Հունան Բաբայանն, ով նոր էր ներգրավել որպես պաշտպանական կողմ, դատարանին միջնորդեց գործի նյութերին ծանոթանալու և մեկուսարանում իր վստահորդի հետ հանդիպելու համար տրամադրել 10 աշխատանքային օր: Դատավոր Սարոյանը միջորդությունը բավարարեց և հաջորդ նիստը նշանակեց փետրվարի 27-ին: