Արդեն 7-րդ ամիսն է` «Ալավերդու բժշկական կենտրոն» ՓԲԸ-ի պոլիկլինիկական մասնաշենքը կապիտալ վերանորոգվում է:  Վերանորոգման աշխատանքները սկսվել են 2012թ. օգոստոսի  8-ից: Բժշկական կենտրոնի վերանորոգվող մասնաշենքը 1988-ի երկրաշարժից վթարային էր և քանդման ենթակա: Վերանորոգումից հետո այստեղ պետք է տեղավորվեն բժշկական կենտրոնի  ամբուլատորիան, գինեկոլոգիական բաժանմունքն ու ծննդատունը, մանկական բաժանմունքը: Այստեղ կհանգրվանի նաև  բժշկական կենտրոնի վարչական ապարատը: Շենքի կապիտալ վերանորոգման համար Համաշխարհային բանկը հատկացրել է 800 հազար ԱՄՆ դոլար կամ 345 մլն դրամ:

Այս պատկառելի գումարով շինարարությունը վստահվել է վարչապետ  Տիգրան Սարգսյանի հարազատին: Հիշեցնենք, որ «Ալավերդու բժշկական կենտրոն» ՓԲԸ-ի պոլիկլինիկական մասնաշենքի կապիտալ վերանորոգումն իրականացնում է  Վանաձորում գրանցված  «Ուկրշին» շինարարական կազմակերպությունը, որի սեփականատերը Տիգրան Սարգսյանի եղբոր որդին է` Հրայր Սարգսյանը: Շինարարության պատվիրատուն ՀՀ առողջապահության նախարարությունն է, շինարական աշխատանքների վերահսկումն իրականացնում է  ՀՀ առողջապահության նախարարության ԾԻԳ-ը: Կապիտալ վերանորոգման ենթարկվող մասնաշենքը Լոռու մարզպետարանի հաշվեկշռում է: Վերջինս, սակայն, իր սեփականությունը հանդիսացող շենքի վերանորոգման աշխատանքները վերահսկելու պարտականություն չունի:

«Որպես շահագործող կազմակերպություն մենք հետևում ենք շինարարական աշխատանքների ընթացքին, բայց ես մասնագիտությամբ շինարար չեմ և չեմ կարող երաշխավորել, որ այնտեղ ամեն ինչ պահանջված որակով է ընթանում»,- ասում է «Ալավերդու բժշկական կենտրոն» ՓԲԸ-ի տնօրեն Ստեփան Մոսինյանը: 

Փետրվարի 6-ին կապիտալ վերանորոգման ենթարկվող մասնաշենքի շինարարական հրապարակում իրականացվող շինարարության ընթացքի և որակի մասին «Հետքը» զրուցեց աշխղեկ Հակոբ Շահբազյանի հետ: Նա ասաց, որ կապիտալ վերանորոգումից հետո շենքի սեյսմիկ կայունությունը նախատեսված է 9 բալ երկրաշարժի համար: Աշխղեկը ամեն կերպ հավատացնում էր, որ օբյեկտի շինարարական աշխատանքները որակով են կատարվում: Նա մատնացույց էր անում շենքի  նորակառույց  մոնոլիտ հենասյուները: «Տեսեք՝ ինչ նորմալ ձևով է սարքած: Մենք հիմնապատերը փոխարինել ենք մոնոլիտ երկաթբետոնե կոնստրուկցիաներով, շենքի մոնոլիտ, երկաթբետոնե  ծածկերի աշխատանքները հիմնականում ավարտված են: Ուժեղացրել ենք շենքի հիմքերը»,- նշեց աշխղեկը: Վերջինս ասաց, որ ուժեղացվել են նաև հիմնական և միջանկյալ պատերը, դրանք ցանցապատվել են մետաղական ցանցով և բետոնապատվել: Միջհարկային ծածկերը նույնպես ամրացված են երկաթբետոնե կոնստրուկցիաներով:

Հիմնականում այդքանով ավարտվել են շենքի ուժեղացման աշխատանքները: Աշխղեկը նաև տեղեկացրեց, որ ներկայումս օբյեկտի վրա կատարվում են ներքին հարդարման նախապատրաստական աշխատանքներ: Կա օբյեկտի շինարարական աշխատանքները վերահսկող կազմակերպություն: «Մեզ վերահսկում են ՀՀ առողջապահության նախարարության ԾԻԳ-ի մասնագետները, իրենց այցերը շատ հաճախակի են, շաբաթը առնվազն 4 անգամ նրանք այստեղ են լինում»,- շեշտեց աշխղեկը:

Աշխղեկը տեղյակ չէր մինչև օրս շինարարության վրա ծախսված գումարներից, սակայն հայտնեց, որ մասնաշենքի վերանորոգման աշխատանքներում ընդգրկված է 60-ից ավելի բանվոր: Ըստ Հակոբ Շահբազյանի՝ օբյեկտի շինարարական աշխատանքները նախատեսված է  ավարտել  այս տարվա մայիսին, որի հավանականությունը, սակայն, շատ փոքր է: