Կիմա Խաչատրյան

Զարմանալին այն է, որ Պարույր Հայրիկյանի դեմ կատարվածը որակվեց որպես մահափորձ. դա հանցագործություն էր: «Դրանով փորձ արվեց, որ այս քարոզարշավը խաղաղ ֆոն չստանա, առանց այն էլ ընտրությունները մրցապայքարի տեսք էլ չունեին»,- այսօրվա մամուլի ասուլիսին նման միտք հայտնեց քաղաքական և ընտրական տեխնոլոգիաների փորձագետ Արմեն Բադալյանը:

«Ոչ ոք մարդասպանի կողքը չի եղել, որ ասի` ուզում էր սպաներ, թե վիրավորեր: Սկսեցին շահարկել «պետականության դեմ ուղղված մահափորձ» արտահայտությունը: Պետականության խորհրդանիշը դրոշն է, օրհներգը, զինանշանը, բայց մարդը չէ, իսկ Հայիկյանը անկախության խորհրդանիշը չէ»,- նշեց Արմեն Բադալյանը:

Փորձագետը նաև խոսեց այն մասին, որ միանգամից շրջանառության մեջ դրվեց ռուսական իմպերիալիզմի հատուկ ծառայությունների մասին վարկածը:

«Այնպես է ստացվում, որ Հայրիկյանի դեպքում, փաստորեն, ռուսական իմպերալիզմի հատուկ ծառայությունները հավանաբար քիլերին ֆայլա բազարից էին գտել, որ 25 սմ-ից վրիպեց»,- ասաց Արմեն Բադալյանը:

Այն հարցին, թե որքանով բարձրացավ Հայրիկյանի վարկանիշը միջադեպից հետո, փորձագետը պատասխանեց, որ, միևնույնն է, ազնիվ քվեակություն չի լինելու, և մասնակցության թիվը նկարվելու է Բաղրամյան 26-ում:

«Մենք ստանում ենք տեղեկություններ, որ շրջաններում մարդկանց տներ են մտնում եւ գումար առաջարկում, որ գնացեք ընտրության, ում ուզում եք ընտրեք, միայն թե գնացեք»,- ասաց Արմեն Բադալյանը:

Անդրադառնալով մյուս թեկնածուներին` Արմեն Բադալյանն ասաց, որ PR տեխնոլոգիաները պետք է բխեն հասարակության արժեհամակարգից: Երբ Րաֆֆի Հովհաննիսյանը գնում է մազերը վարսավիրանոցում կտրելու կամ ձեռքով բարևում է քաղաքացիներին, դա լուրջ չի ընկալվում, քանի որ մենք ունենք ասիական մտածելակերպ: Նրա կարծիքով, սխալ է նաև  Հրանտ Բագրատյանի` գյուղ առ գյուղ ընկած Հարվարդի համալսարանի տնտեսագիտություն բացատրելը: Իսկ Հայրիկյանն էլ, ըստ նրա, գերագնահատում է իրեն: Փորձագետը սխալ է համարում նաև Ադրեաս Ղուկասյանի հացադուլը, քանի որ վստահ է, որ այն արդյունք չի ունենալու: