![](/static/articles/02/31/24/l-D8gK603zFQ.jpg)
«Հրապարակ». Ջհանգիրյանն էլ է կողմ եղել
Փետրվարի 1-ին ԱԺ պետաիրավական հարցերի հանձնաժողովի նիստում մի խայտառակ օրինագծի հաստատմանն աջակցել է նաեւ ՀԱԿ պատգամավոր, նախկին զինդատախազ Գագիկ Ջհանգիրյանը, որը կողմ է քվեարկել այդ օրինագծին: Խոսքը «Դատախազության մասին» օրենքում փոփոխություն կատարելու մասին» է, որով նախատեսվում է այդ համակարգում համազգեստ կրելը պարտադիր դարձնել, եւ բյուջեն ստիպված կլինի մի քանի 100 հազար դոլարի հատկացում անել: Այն դեպքում, երբ նվազագույն աշխատավարձը բարձրացնում են 2.5 հազար դրամով:
Արդարադատության նախարար Հրայր Թովմասյանի ներկայացրած նախագիծը պետաիրավականի նիստում ընդամենը մեկ «դեմ» է ունեցել` ԲՀԿ-ական Տիգրան Ուրիխանյանը, ինչը թերեւս կարելի է բացատրել ԲՀԿ-ի` Հրայր Թովմասյանի նկատմամբ ոչ բարիդրացիական վերաբերմունքով: Ընդդիմադիրներից նիստին չեն մասնակցել Զարուհի Փոստանջյանը եւ Արծվիկ Մինասյանը, իսկ անկախ պատգամավոր Էդմոն Մարուքյանը եւ ՀՀԿ-ականներ Դավիթ Հարությունյանը, Արփինե Հովհաննիսյանը, Հովհաննես Սահակյանն ու Լեւոն Մարտիրոսյանը կողմ են քվեարկել, եւ հարցը մտել է օրակարգ:
«Այո, դուք ճիշտ եք, միայն ես եմ դեմ քվեարկել,- թերթի հետ զրույցում հաստատել է Տիգրան Ուրիխանյանը,- ես հարցրել եմ` արդյոք սոցիալական նման ծանր իրավիճակում, սոված ընտանիքների գոյության պարագայում նման միջոցների վատնումն արդարացվա՞ծ եք համարում»:
Իսկ նախարարը, ըստ Ուրիխանյանի, պատասխանել է. «Իհարկե, արդարացնում եմ, որովհետեւ դրանից դատախազներն ավելի զգոն ու զգաստ կլինեն, ավելի պատկառելի տեսք կունենան»:
Մեկնաբանել