«Հետքի» հարցերին պատասխանել է «Խոսրովի անտառ» պետական արգելոցի ժամանակավոր պաշտոնակատար Հրաչյա Հովակիմյանը 

Որտեղի՞ց եք ծնունդով եւ որտե՞ղ եք ներկայումս բնակվում:

Ծնունդով Երևանից եմ, բնակվում եմ Նոր-Արեշ 45 փողոց, տուն 60: 

Ըստ ՀՀ բնապահպանության նախարարության պաշտոնական կայք էջի հրապարակման` դուք ունեք տնտեսագետի որակավորում: Կարո՞ղ եք ասել` կոնկրետ ինչ մասնագիտություն ունեք:

Մասնագիտությամբ ֆինանսիստ եմ: 

Ավարտել եք բուհը 1988թ., ավարտելուց հետո որտե՞ղ եք աշխատել:

1992թ. հունվար ամսից աշխատել եմ «Խոսրովի անտառ» պետական արգելոցում պահպանության գծով փոխտնօրենի պաշտոնում: 

1992թ.-ին դարձել եք «Խոսրովի անտառ» պետական արգելոցի պահպանության գծով փոխտնօրեն: Այդ տարիներին որսագողության դեպքեր եղե՞լ են արգելոցում, թե՞ ոչ: Տարեկան քանի՞ դեպք եք հայտնաբերել և արձանագրել:

Այո, եղել են բազմաթիվ դեպքեր: Սակայն ինձանից առաջ և հետո հայտնաբերված
որսագողության, ձկնագողության և այլ խախտումների մասով բացահայտման դեպքեր ոչ ոք դեռ չի գերազանցել: Դեպքերի քանակությունը և համեմատականը կարող եք ճշտել «Հայանտառ» ՊՈԱԿ-ի արխիվներից: 

«Հայանտառում» որ թվականին ի՞նչ ղեկավար պաշտոն եք զբաղեցրել:

1994-1995թթ. «Հայանտառ» անտառների ՊԱՀՊ ծառայության հատուկ ջոկատի ստորաբաժանման ղեկավար:

1995-1997թթ. ՀՀ բնապահպանության և ընդերքի նախարարության «Հայանտառ» ՊՁ-ի անտառների և պետական վերահսկողության վարչության պետ:

1998 թվականին ՀՀ բնապահպանության և ընդերքի նախարարության բնապահպանական պետական տեսչությունում որպես տեսչական խմբի պետ:

2000-2002թթ. «Հայանտառ» ՊՓԲ-ում որպես հսկողության բաժնի պետ:

2002-2004թթ. «Հայանտառ» ՊՓԲ-ի գլխավոր տնօրեն:

2004-2005թթ. ՀՀ բնապահպանության նախարարության անտառների վերահսկողության բաժնի պետ:

2006-2007թթ. ՀՀ բնապահպանության նախարարի խորհրդական:

Փաստորեն, դուք «Հայանտառում» աշխատել եք այն տարիներին, երբ զանգվածաբար հատվում էին անտառները: Ըստ ձեր տվյալների` այդ ժամանակ որքա՞ն են եղել տարեկան ապօրինի ծառահատումները: Ինչպե՞ս կգնահատեք ձեր աշխատանքը «Հայանտառում»:

Հաշվի առնեելով ցուրտ ու մութ տարիները, այո եղել են մասայական հատումներ: Կոնկրետ տվյալների համար կարողք եք դիմել «Հայանտառ» ՊՈԱԿ, իսկ իմ աշխատանքը ելնելով ժամանակի իրավիճակից գնահատում եմ բավարար: 

Ապօրինի անտառահատումների գործով հարուցած քանի՞ քրեական գործերով եք հարցաքննվել:

Կրկնում եմ` ճշգրիտ տվյալներ կարող եք ստանալ «Հայանտառ» ՊՈԱԿ-ից: Համենայնդեպս, ես որևէ բանում երբևէ չեմ մեղադրվել, առավել ևս` չեմ հարցաքննվել: 

Լուրեր են պտտվում, որ դուք դարձել եք «Հայանտառի» տնօրեն, քանի որ ունեցել եք բարձրաստիճան պաշտոնյա ընկերներ, արդյոք դա ճի՞շտ է և ո՞վ է եղել այդ բարձրաստիճան պաշտոնյաները:

Ծանոթանալով իմ աշխատանքային կենսագրությանը կարծում եմ դուք ավելորդ կհամարեք այդ հարցը: 

2004թ. ՀՀ բնապահպանական պետական տեսչության անտառների վերահսկողության բաժնի պետ եք եղել, 2004 թվականից մինչև ո՞ր թվականն եք աշխատել այս պաշտոնում:

2004 թվականին հաղթող եմ ճանաչվել քաղ. ծառայության մրցույթում և նշանակվել եմ անտառների վերահսկողության բաժնի պետ:

Ի՞նչն էր պատճառը, որ լքեցիք այդ պաշտոնը:

Սակայն 2005թ. առողջական խնդիրների պատճառով դուրս եմ եկել աշխատանքից: 

2006-2007թթ. եղել եք ՀՀ բնապահպանության նախարարի խորհրդական: Հատկապես ի՞նչ խորհուրդներ էիք տալիս նախարարին:

Կատարել եմ տվյալ պաշտոնի համար նախատեսված աշխատանքային պարտականությունները:

2007թվականից զբաղվել եք մասնավոր գործունեությամբ, ո՞ր բնագավառում և ի՞նչ գործունեություն եք ծավալել: Արդյո՞ք փայտամշակման բիզնեսով էիք զբաղվում:

Երբևէ փայտամշակման և նմանատիպ գործունեությամբ (բիզնես) չեմ զբաղվել: 

Ինչո՞ւ որոշեցիք դառնալ արգելոցի ժամանակավոր պաշտոնակատար:

 Իսկ ինչու ոչ: 

Մասնակցելո՞ւ եք ՀՀ բնապահպանության նախարարության կողմից հայտարարվող մրցույթին, թե՞ ոչ:

Այո, մասնակցելու եմ: 

Ինչպե՞ս եք վերաբերվում Խոսրովի արգելոցում վերջերս տեղի ունեցած ապօրինություններին, մասնավորապես` Գիլանի  կառույցի ապամոնտաժման հանրության պահանջին, որսագողությանը, ի՞նչ կարող եք անել որսագողությունն արգելոցում  իսպառ վերացնելու համար, կարո՞ղ եք արդյոք «ոսկե» համարներով ավտոմեքենաների մուտքն արգելել «Խոսրովի արգելոց»:

Վերաբերմունքս բացասական է, ինչպես նախկինում պայքարը որսագողության դեմ լինելու է համար մեկ խնդիրը: Արգելոցային ռեժիմը «ոսկյա» համարանիշներ չի ճանաչում: 

Ինչպե՞ս եք պատրաստվում համագործակցել բնապահպանական ակտիվիստների հետ. փաստորեն, իրենք ձեր անձի նկատմամբ եւս ունեն որոշակի կասկածներ:

Պատրաստ եմ համագործակցել բոլոր հասարակական և միջազգային կառույցների հետ, այդ թվում` ակնկալում եմ բնապահպանական ակտիվիստների գործնական աջակցությունը, քանի որ աշխատանքները լինելու են բաց և թափանցիկ: 

Միջազգային կազմակերպությունների հետ աշխատանքի փորձ ունե՞ք, եթե այո, ապա թվարկեք:

Իմ աշխատանքային պրակտիկայում «Հայանտառ» ՊՈԱԿ-ի տնօրենի պաշտոնում համագործակցել եմ "FAO", "SIDA" միջազգային կազմակերպությունների հետ: 

Ինչպե՞ս եք պատրաստվում աշխատել միջազգային կազմակերպությւոնների հետ, գիտեք արդյոք, որ նրանք ժամանակավոր դադարեցրել են իրենց ֆինանսավորումները Խոսրովի արգելոցում՝ հաշվի առնելով նախորդ մրցույթը:

Ի գիտություն` միջազգային կառույցների հետ համագործակցությունը վերականգնված է:

Ի դեպ, հնարավո՞ր է արդյոք, որ Գաբրիել Պողոսյանին կրկին փոխտնօրեն նշանակեք:

Փոխտնօրենի նշանակումները «Խոսրովի անտառ» պետ. արգելոցի տնօրենի իրավասություններից դուրս է: