Այսօր Ազգային ժողովում քննարկվում էր «Հանրային ծառայության մասին» ՀՀ օրենքի նախագիծն առաջին ընթերցմամբ ընդունելու հարցը: Հիմնական զեկուցող արդարադատության նախարար Հրայր Թովմասյանը, ներկայացնելով օրենքի նախագիծը, ասաց, որ այն ունի հակակոռուպցիոն ուղղվածություն, քանի որ այսօր գործող գույքի եւ եկամուտների հայտարարագրի մեխանիզմներում առկա չէին վերահսկելիության հստակ մեխանիզմներ:

Սահմանադրական արգելքը, որ պատգամավորները չեն կարող զբաղվել ձեռնարկատիրական գործունեությամբ, ըստ նախարարի, միջազգային պրակտիկայում եւ գրականության մեջ դիտարկվում է որպես ակտիվ ձեռնարկատիրական գործունեությամբ զբաղվելու սահմանափակում, իսկ պասիվ ձեռնարկատիրությամբ զբաղվելը, օրինակ` բանկում ավանդ ունենալը, բիզնեսը հավատարմագրային կառավարմանը հանձնելը եւ այլն, չեն համարվում ձեռնարկատիրական գործունեություն, եւ բարձրաստիճան պաշտոնյաններին թույլատրված է:

Նախատեսվում է ստեղծել բարձրաստիճան պաշտոնյանների էթիկայի հանձնաժողով: Նախագծով այն կազմված է լինելու հինգ անդամից` նախագահ, նախագահի տեղակալ եւ երեք անդամ: Հանձնաժողովի անդամներին նշանակելու է ՀՀ նախագահը` վարչապետի, Սահմանադրական դատարանի նախագահի, ՀՀ Վճռաբեկ դատարանի նախագահի, գլխավոր դատախազի, հանրային խորհդի ներկայացմամբ` յուրաքանչյուրը մեկական անդամ սկզբունքով եւ հինգ տարի ժամկետով:

Պատգամավոր Կորյուն Նահապետյանը նախարարին հարցրեց, թե բարձրաստիճան պաշտոնատար անձանց էթիկայի հանձնաժողը քննարկելու է արդյոք պատգամավորների, դատավորների, դատախազի, ՍԴ անդամների էթիկային վերաբերող հարցեր: Հրայր Թովմասյանը պատասխանեց, որ հենց այդ հանձնաժողովն է զբաղվելու վերը նշված պաշտոնյանների էթիկայի հարցերով:

Իսկ պատգամավոր Արծվիկ Մինասյանին հետաքրքրում էր, թե հանրապետության նախագահին եւ այլ բարձրաստիճան պաշտոնյաններին վերաբերող հարցերը հանձնաժողովի քննարկման առարկա լինելու է, թե ոչ, եւ արդյոք ԶԼՄ-ի հրապարակած նյութերը եւս կքննարկվեն հանձնաժողովում: Հրայր Թովմասյանն ասաց, որ հանձնաժողովը վարույթ է հարուցելու բացառապես իր նախաձեռնությամբ: «Այս հանձնաժողովը վարույթ չի իրականացնում, որովհետեւ հանձնաժողովի ընդունած եզրակացությունները պարտադիր իրավական հետեւանքներ չունեն եւ անձի համար նոր իրավունքներ ու պարտականություններ չեն ստեղծում: Անշուշտ, ապահովում է որոշակի հրապարակայնություն եւ  վերջնական եզրակացություն կայացնողներն այն մարմիններ են որտեղ նրանք աշխատում են»,- ասաց Հ. Թովմասյանը:

Լուս.` Ֆոտոլուրի