Սեռական ճամապարհով փոխանցվող հիվանդությունները կարող են լուրջ հետևանքներ թողնել ազգի վերարտադրողականության վրա: Այս մասին լրագրողների հետ հանդիպման ժամանակ խոսեց բժիշկ-ուրոլոգ, Վ.Ավագյանի անվ. բուժկենտրոնի անդրոլոգիայի ծառայության ղեկավար Գևորգ Գրիգորյանը:

Նրա խոսքերով` հիվանդության սրացումը պայմանավորված է իրավիճակին լուրջ չմոտենալով և անպտղության մեջ միայն կնոջը մեղադրելով: «Մինչ կինը անընդմեջ այցելում է բժշկին, տղամարդու մոտ հիվանդությունն ավելի է սրվում: Եվ այս ամենը՝ սխալ մենթալիտետի հետևանքով»,- ավելացրեց բժիշկը:

Իսկ «Ցինտո» ախտորոշիչ կենտրոնի լաբորատոր ծառայության ղեկավար Անահիտ Պետրոսյանի կողմից տրված տվյալների համաձայն` իրենց կենտրոն վերոնշյալ հիվանդությամբ դիմող այցելուների թիվը նախորդ տարվա հետ համեմատած 1,5 անգամ ավելացել է: Նրա հավաստմամբ՝ հիվանդության պատճառներից ամենատարածվածը տղամարդկանց արտագնա աշխատանքների ընթացքում անկանոն կապերն են: «Տարեկան մեր կենտրոն տարբեր հիվանդություններով դիմում է ավելի քան 3000 տղամարդ, որոնց 30-40 %-ը կազմում են սեռավարակային հիվանդություններով դիմողները: Եվ ցավալին այն է, որ շատ դեպքերում անպտղության հետևանք դարձած հիվանդությունը անբուժելի է դառնում, և անգամ վիրահատական միջամտությունները ելք չեն լինում»,- նշեց Ա. Պետրոսյանը:

Նա նաև ավելացրեց, որ եթե առաջ հանրապետությունում գործում էին մեկ կամ երկու նմանատիպ կենտրոններ, ապա այսօր դրանց թիվը հասնում է 7-8-ի: Եվ պատճառը ոչ թե բիզնեսն է, այլ հիվանդության մեծ տարածում ունենալը: Լրագրողների այն հարցին, թե հատկապես տարիքային որ խումբն է առավել հաճախ դիմում այս խնդրով, բժիշկը հայտնեց, որ կանանց դեպքում 19 և բարձր, իսկ տղամարդկանց դեպքում` 25-40: Վերջում բժիշկը խորհուրդ տվեց պարբերաբար հետազոտվել և, որ ամենակարևորն է, վարել ճիշտ ապրելակերպ:

Տաթևիկ Հարությունյան

ԵՊՀ ժուռնալիստիկայի ֆակուլտետ, 4-րդ կուրս