ՀՀ տարածքային կառավարման նախարարի առաջին տեղակալ Վաչե Տերտերյանն այսօր Բրյուսելում մասնակցեց Եվրամիության Արեւելյան գործընկերության շրջանակում իրականացվող տարածքային զարգացման փորձնական ծրագրերի տեղեկատվական խորհրդաժողովին եւ ծրագրերի մեկնարկի միջոցառմանը: Վ. Տերտերյանը միջոցառումներին մասնակցում է որպես Հայաստանի տարածքային զարգացման փորձնական ծրագրերի ազգային համակարգող` Եվրոպական արտաքին գործերի ծառայության` Ռուսաստանի, Արեւելյան գործընկերության, Կենտրոնական Ասիայի, տարածքային համագործակցության եւ ԵԱՀԿ հարցերով տնօրեն Գ. Վայգենդի հրավերով:

ՀՀ տարածքային կառավարման նախարարի առաջին տեղակալի կողմից ներկայացվեցին ՀՀ-ում իրականացվող տարածքային զարգացման ծրագրերը, դրանց մեթոդաբանություններն ու տարածքային զարգացման ծրագրերի իրականացման ինստիտուցիոնալ կառույցները, ինչպես նաեւ տարածքային կառավարման տարբեր ոլորտներում արձանագրված զարգացումները:

Տեղեկատվական խորհրդաժողովի ընթացքում քննարկվեցին տարածքային զարգացման փորձնական ծրագրերի արդյունավետ իրականացմանն ուղղված հարցեր: Ակնկալվում է, որ ԵՄ կողմից փորձնական տարածքային զարգացման ծրագրեր իրականացնելու նպատակով Հայաստանին կտրամադրվի ֆինանսական աջակցություն:

Հասարակայնության հետ կապերի բաժին