Տեսանյութեր
Լուսանկարներ
Նաիրա Կարապետյան. «Հայրենասեր մարդը ժողովրդին չի տանի առճակատման»
«Ոչ միայն իշխանությունները, այլեւ միջազգային բոլոր դիտորդական առաքելությունները փաստում են, որ 2013 թվականի նախագահական ընտրությունները լավագույնն էին Հայաստանի Հանրապետության 21-ամյա պատմության մեջ: Կարծում եմ, դրա վառ ապացույցն է նաեւ այն հանգամանքը, որ որոշ համայնքներում գործող իշխանությունը հավաքեց ավելի քիչ քվե»,- «Հետքի» հետ զրույցում ասաց ՀՀԿ խմբակցության պատգամավոր Նաիրա Կարապետյանը:
Ըստ նրա` հասարակության լայն զանգվածը կատարել է իր ընտրությունը` վստահության քվե տալով գործող նախագահին, ինչի մասին են վկայում ԿԸՀ արձանագրած արդյունքները:
«Ինչ վերաբերում է հասարակության մեջ հնչող դժգոհություններին, ես դա նորմալ եմ համարում, ժողովրդավար երկրներում դա սովորական հետընտրական գործընթաց է համարվում»,-ավելացրեց պատգամավորը:
Անդրադառնալով երեկ ԵԱՀԿ/ԺՀՄԻԳ դիտորդների ընտրություններից հետո իրենց կազմած զեկույցի ներկայացման ժամանակ մի խումբ երիտասարդների բողոքի ակցիային, որով ընդհատել էին զեկուցողների դրական գնահատականները եւ ներկայացրել իրենց դժգոհությունը, ըստ որի` ընտրությունները կեղծվել են, Նաիրա Կարապետյանն ասաց, թե իրենց խառնվածքով երիտասարդներն ըմբոստ են, ծայրահեղական եւ հաճախ մաքսիմալիստական քայլերի են գնում` ցանկացած հարցում, ցանկացած վայրում, ցանկացած երկրում, եւ ոչ միայն ընդդիմադիր դաշտում:
Նաիրա Կարապետյանը դժվարացավ կանխատեսել, թե ինչ կփոխվի Սերժ Սարգսյանի եւ Րաֆֆի Հովհաննիսյանի հանդիպումից, եթե այն կայանա: «Դժվարանում եմ կանխատեսումներ անել, սակայն մի բան հստակ է` հայրենասեր մարդը ժողովրդին չի տանի առճակատման»,-ավելացրեց պատգամավորը:
Մեկնաբանություններ (1)
Մեկնաբանել