Այսօր Շիրակի մարզի ընդհանուր իրավասության դատարանում, նախագահությամբ Մարտին Սարոյանի, շարունակվեց Կարեն Եսայանի սպանության գործով դատաքննությունը: Դատական նիստը սկսվեց դատակոչված վկաների հարցաքննությամբ: Նախ վկայություն տվեց տուժողի իրավահաջորդ Անահիտ Իսկանդարյանն, ում գործի շահերից ելնելով՝ ներգրավել էին որպես վկա: Վերջինս պատմեց, որ դեպքի նախորդ օրը՝ 2012թ-ի ապրիլի 11-ի երեկոյան, տղան ընկերոջ՝ Ռոմանի հետ, մեքենան տարել է ավտոլվացման կետ եւ վերադարձել առանց մեքենայի:

«Դրսում անձրեւային եղանակ էր ու Կարենս ասաց, որ մեքենան թողել է այնտեղ, կվերցնի վաղ առավոտյան: Հաջորդ օրը տղաս գնաց տանից ու էն գնալն էր, որ գնաց: Ես առավոտյան վարսավիրանոց էի գնացել, հետո իմացա, որ Կարենը տանից 10-ի կողմ է դուրս եկել: Երեւի ժամը 11-ի կողմերն էր, ինձ զանգեց Ռոմանը, Կարենիցս հարցրեց, հետո հայտնեց, որ հեռախոսազանգերին չի պատասխանում»,-պատմեց Անահիտ Իսկանդարյանը:

Վկան ասաց, որ ապրիլի 12-ին՝ ժամը 15-ին ինքը, ամուսինը եւ տղան պիտի գնային Վարդան Ղուկասյանենց տուն, որտեղ կատարվելու էր Կարենի եւ Մայայի նշանադրության արարողությունը: Մինչ այդ պիտի «Գալանտուս» ծաղիկների սրահից վերցնեին պատվիրած ծաղկեփունջը, մնացած նվերները վաղօրոք էին պատրաստել: Երբ հասկացել են, որ Կարենն անհետացել է, ընկերները գնացել են ավտոլվացման կետ, հարցուփորձ արել աշխատակիցներին, այնուհետեւ խնդրել ավտոլվացման կետում տեղադրված տեսախցիկների կատարած ձայնագրությունները: Վկան ասաց, որ այդ տեսաերիզներն ինքն էլ է նայել ու համոզված է, որ տղային մեքենայով օրեր շարունակ հետեւողն ու նրան սպանողը Հարություն Սարգսյանն է:

Դատարանում վկան հիշեց, որ NEO 595 համարանիշով արծաթագույն «Մերսեդես» մակնիշի ավտոմեքենան, որ պատկանում է ամբաստանյալին, դեպքից մեկ շաբաթ առաջ տեսել է իրեն պատկանող խանութի դիմաց: «Այդ նույն մեքենան մեզ հետեւել է նաեւ, երբ մենք Երեւան գնալիս ենք եղել»,-պնդեց Անահիտ Իսկանդարյանը: Այս մասին վկան իր նախաքննական ցուցմունքներում չէր նշել եւ ասաց, որ միայն վերջերս է հիշել:

Ամբաստանյալի փաստաբան Լուսինե Սահակյանին հետաքրքրում էր, թե Անահիտ Իսկանդարյանը որ օրը եւ որ ժամին է դիտել լցակայանից բերված տեսաերիզները: «Նույն օրը, երեւի մի երկու ժամ անց Կարենի անհայտանալուց հետո»,-պատասխանեց Անահիտ Իսկանդարյանը: Վկան պնդեց, որ իրենց ձեռքի տակ եղած տեսաերիզները ապացուցում են, որ տղային սպանել է Հարություն Սարգսյանը: Փաստաբանը միջնորդեց դատարանին, որպեսզի պաշտպանական կողմին տրամադրվի վկայի մոտ եղած, սակայն քրեական գործից բացակայող տեսաերիզները: Այնուհետեւ Լուսինե Սահակյանը հետաքրքրվեց վկայից, թե Կարենը տանից դուրս գալուց առաջ նախաճաշել է: «Չեմ կարծում,-պատասխանեց վկան,-ես տանը չեմ եղել, բայց Կարենն այդ ժամին դժվար թե հաց ուտեր: Ինքն ու հայրն են եղել, սուրճ է խմել ու դուրս է եկել»: «Իսկ ալկոհոլ օգտագործում էր»,-հարցրեց փաստաբանը: «Իմ տղեն խմող չէր, միայն ծխում էր»,-պատասխանեց վկան: «Իսկ նրա մոտ գումար եղե՞լ է այդ օրը»,-կրկին հետաքրքրվեց փաստաբանը: «Ոչ,-պատասխանեց վկան,-միայն տաքսու փող, որ վերցրել էր հորից, որ գնա մենքենայի հետեւից»:

Վկաներից Ռոբերտ Քոչարյանն, ով նշված ավտոլվացման կետի աշխատակից է, պատմեց, որ ապրիլի 11-ի երեկոյան Ռոման Ղարաքեշիշյանը լցակայան է եկել ընկերոջ հետ, ում ինքը չի ճանաչել: Նախ լվացել են Ռոմանին պատկանող «Լեքսուս», մակնիշի մեքենան: Այդ ընթացքում երկու տղաները արծաթագույն «Մերսեդեսով» գնացել են ու վերադարձել կես ժամ անց: Այնուհետեւ իրենք լվացել են Կարենին պատկանող «Մերսեդեսը», աշխատանքն ավարտել են մոտավորապես 21:30-ի կողմերը: Դրսում անձրեւ է սկսվել, եւ Կարենը հարցրել է, թե կարող է արդյոք մեքենան թողնել լցակայանում եւ վերցնել հաջորդ օրն առավոտյան, իրենք էլ պատասխանել են, թե՝ հարց չկա: Ռոմանի եւ Կարենի հեռանալուց հետո վկան ու իր գործընկերները այլ մեքենայի չեն սպասարկել: Լցակայանը փակել են ժամը 22-ին:

Հաջորդ օրը վկան, թեպետ աշխատանքային գրաֆիկով իր ազատ օրն է եղել, առավոտյան ժամը 10:30-ի սահմաններում գնացել է աաշխատանքի վայր ու տեղեկացել, որ ժամը 10:00-ին Կարենն եկել տարել է մեքենան: Հետո մի քանի ժամ անց ոստիկաններ են եկել ավտոլվացման կետ ու աշխատակիցներին տարել ոստիկանություն, այնտեղ էլ իմացել է Կարեն Եսայանի անհետացան մասին: Վկան նաեւ հայտնեց, որ թեեւ անձամբ լավ չի ճանաչում ամբաստանյալ Հարություն Սարգսյանին, սակայն հաճախակի է նրան տեսել լցակայանում: «Դե կբերեր ավտոն լվանալու: Հիմնականում արտասահմանյան ավտոներ էին իրանը»,-հիշեց վկան:

Մինչեւ ավտոլվացման կետի աշխատակից Անդրանիկ Մուրադյանի հարցաքննությունը սկսելը, ամբաստանյալի շահերի պաշտպան Հունան Բաբայանը հայտարարեց, որ արդեն երկրորդ վկան է հարցաքննվում առանց անձը հաստատող փաստաթղթի, եւ դա պարզապես անթույլատրելի է: Պարզվեց՝ վկան դատարան էր ներկայացել առանց անձնագրի եւ դատավոր Մարտին Սարոյանը հարցաքննության հրավիրեց հաջորդ վկային՝ Անդրանիկ Մուրադյանին ուղարկելով տուն՝ անձնագրի հետեւից:

Դատակոչված հաջորդ վկան սպանվածի մոտ ընկերն էր: Ռոման Ղարաքեշիշյանը դեպքի նախորդ օրն ուղեկցել էր ընկերոջը՝ միասին մեքենաները տարել են լվացման կետ: Վկան շատ ցածր էր խոսում եւ պաշտպանական կողմը պահանջեց, որ Ռոման Ղարաքեշիշյանը հնարավորինս բարձր ձայնով պատմի դեպքի մանրամասները: «Մոտ եկեք»,-ի պատասխան փաստաբանի պահանջի՝ անվրդով նետեց վկան: Ռոմանը պատմեց, որ նախ լվացել են իր մեքենան, հետո Կարենի: Քանի որ դրսում անձեւ է եղել, Կարենը գերադասելէ մեքենան թողնել լցակայանում: Հաջորդ օրն ինքը քնով է անցել ու արթնացել միայն 10:30-ի կողմերը: Զանգել է ընկերոջը, որ տեղեկանա, թե վերջինս գնացել է մեքենայի հետեւից: Զանգերին Կարենը չի պատասխանել: Այնուհետեւ զանգել է Անահիտ Իսկանդարյանին: Վերջինս նույնպես տեղյակ չի եղել, թե ինչու տղան չի պատասխանում հեռախոսազանգերին:

Երբ ճշտել են, որ ընկերներից ոչ ոք տեղյակ չէ Կարենի մասին, խառնվել են իրար, գնացել ավտոլվացման կետ, խնդրել տեսաերիզները: «Դե էդ ձայնագրություններից էլ կերեւար, որ էդ իրիկուն մեզնից հետո մարդ է եկել մոյկա ու հարցրել է, թե առավոտը որ ժամին կբացվին: Հետո մյուս ձայնագրության մեջ կերեւա, թե Կարենի ավտոյի շարժվելուց հետո մի մեքենա էլ կշարժվի իրա հետեւից: Մոյկի աշխատողներից իմացանք, օր գերմանական համարներով ավտո է եղել, իսկ էդպիսի մեքենա քաղաքում Հարութը մենակ կքշե»,-նկատեց վկան:

Գործում ներգրավված մյուս վկաները կհարցաքննվեն հաջորդ դատական նիստի ընթացքում: Ի դեպ, այս քրեական գործում ներգրավված վկաների թիվը հասնում է 40-ի: