Իրանի Իսլամական Հանրապետության քաղաքացի Համիդ Շահլայեի Ջալալին 4 կգ ափիոն տեսակի թմրամիջոց, մաքսային հսկողությունից թաքցնելով, 2012 թ. հոկտեմբերի 11-ին տեղափոխել է ՀՀ տարածք: Հայաստանում ԱԱԾ-ն նրան կալանավորել է: Հարուցվել է քրեական գործ՝ առանձնապես խոշոր չափերով թմրամիջոցների ապօրինի շրջանառության եւ մաքսանենգության մեղադրանքով:

1955 թ. ծնված Համիդ Շահլայեի Ջալալին նախկինում մաքսանենգության համար 2 տարով ազատազրկված է եղել:

Երեկ Կենտրոն և Նորք-Մարաշ համայնքների ընդհանուր իրավասության դատարանում, դատավոր Մնացական Մարտիրոսյանի նախագահությամբ, շարունակվեց այս գործով դատաքննությունը:

Քննությունը պարզել է, որ մեղադրյալը ոմն Ռուբիկ Վարդանյանի խնդրանքով Թեհրանից Երևան է տեղափոխել վերջինիս հարազատների համար նվերներ՝ չիմանալով ճամպրուկում առկա գաղտնի գրպանի և այնտեղ տեղադրված թմրանյութի մասին: Մեղադրյալի պնդմամբ՝ ինքը դիմել է անվտանգության աշխատակիցներին, որպեսզի կապ հաստատեն ճամպրուկի հասցեատիրոջ և ուղարկողի հետ, սակայն աշխատակիցները միջոցներ չեն ձեռնարկել: Իսկ ավելի ուշ վերոնշյալների հետ կապ հաստատել չի ստացվել:

Համիդ Շահլայեի Ջալալիի խոսքով՝ ինքը հաճախ էր գալիս Հայաստան՝ որպես զբոսաշրջիկ: Իսկ նախկինում, երբ աշխատում էր որպես Թեհրան-Երևան ավտոբուսի վարորդ, երբեք անգամ դեղահաբեր չի բերել՝ իմանալով Հայաստանի օրենսդրությունը: Մեղադրյալի հավաստմամբ՝ ինքը ճամպրուկի տիրոջը՝ Ռուբիկին, ճանաչում է 2 տարի, երբ նրանք Թեհրանում ապրում էին հարևանությամբ, և իրենց միջև ընկերական կամ գործնական հարաբերություններ չեն եղել, և նախկինում ինքը Ռուբիկի խնդրանքով երբեք Հայաստան որևէ բան չի բերել:

Դեռեւս նախորդ նիստին Համիդ Շահլայեի Ջալալու պաշտպանը` Արման Թամրազյանը, առարկություն հայտնեց այն հարցի շուրջ, որ ԱԱԾ աշխատակիցները ձերբակալումից անմիջապես հետո իրեղեն ապացույցների վրա կնիք չեն դրել, ինչը կարող է կասկածի տեղիք տալ:

Երեկվա նիստում մեղադրող Գրիգոր Տիգրանյանը ներկայացրեց իրեղեն ապացույցները` ճամպրուկը, և դրանից առանձնացված գաղտնի գրպանը՝ մեկ ընդհանուր փաթեթի մեջ, որը կնքված էր փորձագետների կողմից, 4 կգ ափիոն տեսակի թմրանյութը ( մոտավորապես 80 մլն ՀՀ դրամ արժողությամբ), ինչը հաստատեցին նիստին ներկա փորձագետներ Կարեն Ղարիջյանն ու Վահե Զոհրաբյանը:

Գրիգոր Տիգրանյանի հարցին, թե արդյոք ձերբակալման պահին մեղադրյալը տեսե՞լ էր այս նույն փաթեթը, Համիդ Շահլայեի Ջալալին հրաժարվեց պատասխանելուց:

Նախաքննության ընթացքում պարզ է դարձել նաև, որ Համիդ Շահլայեի Ջալալին թմրանյութեր չի օգտագործել, իսկ մեղադրող կողմը նշեց, որ դրանց ապօրինի տեղափոխումը իրացման նպատակ է հետապնդել: Մեղադրող Գրիգոր Տիգրանյանը առաջարկեց ամբաստանյալի համար որպես պատիժ սահմանել 12 տարվա ազատազրկում:

Դատավարությունը շարունակվում է:   

Տաթևիկ Հարությունյան
ԵՊՀ ժուռնալիստիկայի ֆայուլտետ, 4-րդ կուրս