![](/static/articles/02/39/87/l-8OLkZPwrvj.jpg)
Նոր գիրք, որ կխոչընդոտի «ադրբեջանցի պատմաշինարարներին»
Կիմա Խաչատրյան
«Նովոստի» մամուլի ակումբում այսօր տեղի ունեցավ ՀՀ նախագահի աշխատակազմի «Հանրային կապերի և տեղեկատվության կենտրոնի» և ԳԱԱ պատմության ինստիտուտի միջև համագործակցության արդյունքում հրատարակված ՀՀ ԳԱԱ պատմության ինստիտուտի գիտաշխատող, պատմական գիտությունների թեկնածու Արտակ Մաղալյանի «Արցախի մելիքությունները և մելիքական տները XVII-XIX դդ.» գրքի շնորհանդեսը:
Միջոցառմանը ներկա էր նաև ՀՀ նախագահի աշխատակազմի «Հանրային կապերի և տեղեկատվության կենտրոնի» փորձագետ, քաղաքական գիտությունների թեկնածու Ալեն Ղևոնդյանը:
Ղևոնդյանն ասաց, որ «Հանրային կապերի և տեղեկատվության կենտրոնը» արդեն տևական ժամանակ հանրային իրազեկման ոլորտում իրականացնում է ակտիվ գործունեություն, որի հերթական հանգրվանը ԳԱԱ պատմության ինստիտուտի գիտաշխատող Արտակ Մաղալյանի հետ համագործակցության արդյունքում ռուսերեն լեզվով հրատարակված աշխատությունն է:
Ղևոնդյանը նաև նշեց, որ համագործակցության խնդիրը հստակ է՝ Արցախի հիմնահարցի վերաբերյալ օբյեկտիվ պատմական տեղեկատվության ներկայացում ու հանրային իրազեկում:
«Օտարալեզու լսարանին միշտ չէ, որ հասանելի է օբյեկտիվ տեղեկատվություն, հետևաբար՝ խնդիր դրվեց օտարալեզու հարթակներում հստակ գիտական աշխատությամբ ներկայացնել պատշաճ տեղեկատվություն: Գիրքն ամենատարբեր օղակներով տարածվելու է ինչպես ԱՊՀ երկրներում, այնպես էլ այլ հարթակներում, եվրոպական համալսարաններում, հետազոտական կենտրոններում և այլն»,- ասաց Ա. Ղևոնդյանը:
Գրքի հեղինակ Արտակ Մաղալյանը ներկայացրեց գրքի բովանդակությունն ու կիրառական նշանակությունը:
«Գաղտնիք չէ, որ հայոց պատմությունը լայն կեղծարարության թիրախ է մեր հարևան երկրի պատմաշինարարների կողմից: Չկա հայոց պատմության մի շրջան, որ հետևողականորն չկեղծվի ադրբեջանցի պատմաշինարարների կողմից: Նրանց կողմից կեղծարարության հիմնական թիրախը Արցախի պատմությունն է՝ իր ներկայով և անցյալով, Արցախում հայկական պետական կազմավորումների՝ Խամսայի մելիքությունների պատմությունը: Մեր խնդիրն է պարզապես օբյեկտիվ փաստերով իրականությունը ներկայացնել»,- ասաց Ա. Մաղալյանը:
Պատմաբանը ընդգծեց, որ աշխատությունում լայնորեն օգտագործված են արխիվային նյութեր, ժամանակակիցների ձեռագրական սկզբնաղբյուրներ, հայ, մահմեդական, պարսիկ, ռուս, վրացի հեղինակների պատմագրական աշխատություններ, որը օտար ընթերցողին մատչելի լեզվով ցույց կտա Արցախի մելիքությունների պատմությունը և նրանց խաղացած առանցքային դերակատարությունը հայոց պատմության մեջ:
«Եթե մենք այսօր ունենք Արցախի ազատ և ինքնիշխան պետություն, ապա այդ պետության ենթախորքում որոշակի դերակատարություն ունեն Արցախի հայկական մելիքությունները: Դա է աշխատության կիրառական նշանակությունը»,- ասաց Ա. Մաղալյանը:
Աշխատության հավելվածում զետեղված 50 փաստաթղթերը, որոնց մեծ մասը հրատարակվում է առաջին անգամ, ներկայացնում է Արցախի մելիքությունների պատմության մի շարք հիմնահարցեր:
Մեկնաբանել