ՀՀ  էկոնոմիկայի նախարարության հրավերով Զբոսավարների համաշխարհային ֆեդերացիայի նախագահ Ֆելիսիտաս Վրեսինգը և փոխնախագահ Վիլյա Սիբին փետրվարի 27-ից մարտի 3-ը Հայաստանում են՝ քննարկելու մեր երկրում զբոսավարների միջազգային կրթական կենտրոն հիմնելու հնարավորությունը:

Ինչպես նշեց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, դեռևս երկու տարի առաջ «Հայ զբոսավարների գիլդիա» ՀԿ-ի և Զբոսավարների  համաշխարհային ֆեդերացիայի հետ միասին Հայաստանում կազմակերպեցին զբոսավարների միջազգային դասընթացների երկու փուլ. «Մեր նպատակն էր Հայաստանը դարձնել զբոսավարների միջազգային կենտրոն: Այսօր մենք արդեն շատ մոտ ենք դրան»:

«Ես շատ ուրախ եմ, որ  Հայաստանում եմ: Այժմ կատարվում են մի շարք միջոցառումներ: Շատ լավ է, որ դրանք համընկնում են իմ այստեղ լինելու ժամանակահատվածի հետ»,- նշեց Ֆելիսիտաս Վրեսինգը՝ հավելելով, որ զբոսաշրջիկը միայն օտարերկրացի քաղաքացին չէ, այն նաև մեր հայրենակիցն է, ում պետք է սպասարկել ըստ հավուր պատշաճի:

Նա տեղեկացրեց, որ դասընթացների կենտրոնը պարտադիր չէ, որ մի շենքում գտնվի. «Այն կարող է ունենալ մարզային տարածում, որպեսզի մարդիկ գնան և ծանոթանան տարածքին»:

Վերջում հավելեց,որ նման ցուցադրությունների կազմակերպումը շատ կարևոր է իր համար. «Դրանք հնարավորություն են ընձեռում մասնակիցներին հաղորդակցվելու համար»:

Արև Ավագյան