Վերաբնակեցման և հայրենադարձության «Քաշաթաղցիներ» հասարակական կազմակերպության կանոնադրական առաջնային նպատակն է ազատագրված Հայրենիքի բարօրությունը, վերաբնակեցման խթանումը: Այդպիսով մեզանից յուրաքանչյուրն իր ավանդն է բերում Հայրենիքի նվիրյալների կյանքի գնով ձեռք բերված անեղծելի արժեքների ամրագրման համար:

Մենք հայտարարել և հայտարարում ենք, որ վերաբնակեցման գործընթացի արդյունավետության համար առաջին պայմանը արդեն իսկ վերաբնակված, ոչնչից հանրույթ ձևավորած, հասարակական-բարոյական նորմեր ստեղծած, դժվարությունների միջով անցած և այդ դժվարությունները հաղթահարած մարդկանց, այսինքն` քաշաթաղցիների նկատմամբ անիրավություններ թույլ չտալն է: Այն մարդկանց, ովքեր ավելի քան մեկ տասնամյակ է, ինչ Քաշաթաղն իրենց տունն են դարձրել, մարդկանց, ում զավակները քաշաթաղցի են ոչ միայն մտածողությամբ, այլև ծնունդով: 
Լեռնային Ղարաբաղի Հանրապետությունում ամենաբարձր մակարդակով հայտարարված է և, մեր փորձից ելնելով, կարող ենք ասել, որ նաև իրականացվում է օրենքի գերակայության քաղաքականություն: Օրենքի առաջ պետք է հավասար լինեն բոլորը:

Սակայն, վերջին շրջանում Քաշաթաղի շրջանի վարչակազմի ղեկավարության կողմից հաճախ իրականացվել և իրականացվում են այնպիսի գործողություններ, որոնք ոչ միայն չեն գտնում հասարակության բարոյական աջակցությունը, այլև ապօրինի են: Որպես հաստատում կարող ենք նշել, մասնավորապես.

1.Աշխատանքային օրենսդրության հաճախակի խախտումները: 
2.Տեղեկություն ստանալու մարդկանց իրավունքի ոտնահարումը:
3.Պետության կողմից քաղաքացիներին հատկացվող տարատեսակ աջակցությունների բաշխման ընթացքը գաղտնիության մեջ պահելով` անվստահության մթնոլորտի սերմանումը:

Սա հարցի միայն մի կողմն է` իրավական: Սակայն պակաս կարևոր չէ նաև հարցի բարոյական կողմը: Բազմաթիվ դժվարություններ հաղթահարած մարդու համար ամենացավալին հավատի կորուստն է, այն գիտակցությունը, որ տարիների իր վաստակը կարող է քմահաճույքով, ընտրողական մոտեցումով, խտրական վերաբերմունքով մի վայրկյանում հավասարեցվել զրոյի, ինչն անթույլատրելի է մեր պարագայում: 
Ելնելով վերը բերված պնդումներից, որոնցից յուրաքանչյուրը հաստատված է ապացույցներով, Վերաբնակեցման և հայրենադարձության «Քաշաթաղցիներ» հասարակական կազմակերպությունը հայտարարում է. 

Քաշաթաղում ապրող յուրաքանչյուր քաղաքացի արժանի է հարգանքի` անկախ սեռից, ռասայից, մաշկի գույնից, էթնիկական կամ սոցիալական ծագումից, գենետիկական հատկանիշներից, լեզվից, կրոնից, աշխարհայացքից, քաղաքական կամ այլ հայացքներից, ազգային փոքրամասնությանը պատկանելությունից, գույքային վիճակից, ծնունդից, հաշմանդամությունից, տարիքից կամ անձնական կամ սոցիալական բնույթի այլ հանգամանքներից, ինչպես նաև` ԱՆԿԱԽ ՎԱՐՉԱԿԱԶՄԻ ՂԵԿԱՎԱՐՈՒԹՅԱՆ ՀԵՏ ՈՒՆԵՑԱԾ ԱՆՁՆԱԿԱՆ ՀԱՐԱԲԵՐՈՒԹՅՈՒՆՆԵՐԻՑ:

Վերաբնակեցման և հայրենադարձության «Քաշաթաղցիներ» հասարակական կազմակերպություն