Տեսանյութեր
Լուսանկարներ
Երևանի քաղաքապետից խնդրում են 1300 քառ. մետր տարածք՝ 50 սոսի տնկելու համար
«Համայկական բնապահպանական ճակատը» Երևանի քաղաքապետ Տարոն Մարգարյանին հղել է նամակ, որում ասվում է.
«Հարգելի պարոն քաղաքապետ,
Փաստելով Երևան քաղաքի կանաչ, հատկապես ծառապատ տարածքների սակավությունը և հաշվի առնելով ծառատունկի համար բարենպաստ եղանակային պայմանները՝ խնդրում ենք Երևան քաղաքում մեզ տրամադրել 1300 քառ/մ տարածք՝ 50 հատ սոսի տեսակի ծառ (6x6 յուրաքանչյուր ծառի համար) տնկելու համար:
Կարծում ենք, որ քաղաքապետարանն ավելի ճշգրիտ կարող է ասել, թե քաղաքի առավելապես որ հատվածը նման պուրակի կարիք ունի և ապահովվա՞ծ է արդյոք ոռոգման համակարգով:
Մեր կողմից առաջարկում ենք ընտրություն կատարել հետևյալ տարածքներից որևէ մեկում.
- Օղակաձև զբոսայգի
- Նորք-Մարաշի լանջը (կունենա նաև հողապաշտպան նշանակություն)
- «Ֆիրդուսի» շուկայի հետևի մասը (որը պետք է ազատվի աղբից)
- Մոնումենտի լանջը (կունենա նաև հողապաշտպան նշանակություն)
- Էրեբունի թանգարանի մոտ Խ. Դաշտենցի փողոցի հարևանությամբ (հետագայում ծառերի քանակը ավելացնելու դեպքում կծառայի որպես սանիտարական գոտի):
Նախաձեռնող խումբը պատրաստ է իր վրա վերցնել տնկիների տրամադրումը, տարածքի նախնական բարեկարգումը, ծառերի տնկումը, ինչպես նաև հետագա խնամքը, մասնավորապես պարբերաբար ջրելը: Ցանկալի է օժանդակություն տնկիների համար փոսեր փորելու աշխատանքներում:
Ակնկալում ենք սեղմ ժամկետներում ստանալ Ձեր դրական պատասխանը»:
Մեկնաբանել