Վարչապետ Տիգրան Սարգսյանն այսօր մասնացել է «ԴիջիԹեք» Բիզնես ֆորումի և Մայքրոսոֆթ Ինովացիոն ֆորումի բացման արարողությանը: Նա կարևորել է այն մեծ հետաքրքրությունը, որ կա համաժողովի նկատմամբ, քանզի «ԴիջիԹեքը» հարթակ է, որը կառավարությանը հնարավորություն է տալիս շփվելով ոլորտի բոլոր ներկայացուցիչների հետ հասկանալ, թե որոնք են առաջնահերթություններն ու խնդիրները: 

«Այս հարթակի առանձնահատկությունն այն է, որ մենք առարկայորեն տեսնում ենք, թե ընկերությունները, ինչ նվաճումներ ունեն և ինչ նոր արտադրանք ու ծառայություններ են առաջարկում իրենց հաճախորդներին»,- ասել է վարչապետ Սարգսյանը:

Նրա խոսքով՝ 21-րդ դարում առավել քան կարևորվում է տեղեկատվական տեխնոլոգիաների լայնածավալ կիրառումը:

«Եթե գնահատենք ոլորտի 3 տարիների զարգացման տեմպերով, այն մեր տնտեսության մեջ զբաղեցնում է առաջատարի դիրքը: Ես ցանկանում եմ հնչեցնել մի քանի ցուցանիշներ, որոնք վկայում են իմ ասածը. 2009 թ. մենք ավարտել ենք բջջային հեռախոսով ինտերնետից օգտվող 1.100.000, 2010թ.` 1.343.000, 2011թ. առաջին եռամսյակը` 1.700.000 բաժանորդներ ունենալով: Տեսնում ենք, որ երեք տարիների ընթացքում աճի տեմպերը այստեղ բավականին բարձր են: Եթե վերցնենք լայնաշերտ ինտերնետի հասանելիությունը, ցուցանիշները հետևյալն են 2009թ. մենք ավարտել ենք 70.000, 2010-ը 170.000 և 2011թ. առաջին եռամսյակն արդեն 240.000 բաժանորդներով: Չափազանց կարևոր է, որ բաժանորդների քանակը ուղեկցվում է գների նվազմամբ: Մինչև 1 մ/բ վայրկյանում լայնաշերտ ծառայությունների միջինացված գները 2009թ. ավարտել ենք 234.000 դրամով, 2010-ը` 71.000 դրամ, և 2011թ. առաջին եռամսյակում՝ 55.000 դրամ և այս միտումը նույնպես շարունակվում է: Այս տարի մենք արձանագրելու ենք գների նվազում»,- նշել է Տիգրան Սարգսյանը: 

Վարչապետի համոզմամբ՝ առկա միտումները, ընդհանուր առմամբ, ստեղծում են ավելի բարենպաստ պայմաններ տեղեկատվական տեխնոլոգիաների զարգացման համար:

«Ցանկանում եմ նշել նաև, որ տեղեկատվական տեխնոլոգիաների ոլորտը կառավարության կողմից դեռևս հինգ տարի առաջ հռչակվել է որպես առաջնահերթություն, ձևավորվել է խորհուրդ, որը ղեկավարում է վարչապետը, և պարբերաբար ոլորտի ներկայացուցիչների հետ տարբեր ձևաչափերով հանդիպումների ընթացքում մենք քննարկում ենք այն հարցերը, որոնք մտահոգում են ոլորտի ներկայացուցիչներին և փուլ առ փուլ լուծումներ տալով` ստեղծում ենք ավելի բարենպաստ պայմաններ ոլորտի զարգացման համար»,- ասել է Տ. Սարգսյանը: 

Այնուհետև կառավարության ղեկավարն այցելել է «DigiTec Business» ֆորում ցուցահանդես, ծանոթացել բարձր տեխնոլոգիաների ոլորտում աշխատող ընկերությունների առաջարկներին:

Արդեն 4-րդ անգամ անցկացվող Դիջիթեք ֆորումն այս տարի, բաղկացած կլինի բացի Մայքրոսոֆթ Ինովացիոն ֆորումից, «DigiTec Business» ֆորում ցուցահանդեսից և Տեխնոլոգիական կոնֆերանսերի և սեմինարների շարքից, որոնց ընթացքում ներկայացվելու են ընկերությունների կողմից նախագծված վերջին լուծումներն ու ծառայությունները, որոնք նախատեսված են պետական մարմինների և գործարարների համար: Այս մասին տեղեկացնում են կառավարության մամուլի ծառայությունից: