«Ընդունվել են փոքր ու միջին ձեռնարկատիրության պետական աջակցության մասին օրենք, ռազմավարություն, ստեղծվել են ոլորտին աջակցող օղակներ, և նոր օրենքի ընդունման անհրաժեշտություն չկա»,- հայտարարել է էկոնոմիկայի նախարար Տիգրան Դավթյանը:

«ՉԻ» - Հիշում եք, չէ՞, հավերի բազմացման վարիանտների մասին անեկդոտը, երբ բազմաթիվ էքսպերիմենտներից հետո պարզվում է, որ վարիանտ շատ կա, բայց այլևս հավ չկա: Հայաստանում փոքր և միջին ձեռնարկատիրությունը ճիշտ նույն վիճակում է հայտնվել` պարզապես վերացել է. հետևաբար, նոր օրենքի ընդունման անհրաժեշտություն իսկապես չկա:

Ինչ վերաբերում է փոքր և միջին ձեռնարկատիրության պետական աջակցության ռազմավարությանը, ապա Հայաստանի իշխանություններն այդ աջակցությունը ցուցաբերել են փուլ առ փուլ` չորս փուլով: Ճիշտ այնպես, ինչպես բժիշկը` վիրահատության ժամանակ: Հիշո՞ւմ եք փուլերը. «լանցետ... պինցետ... օղի... օղորմի»:

Չնայած` մեր դեպքում փոքր ու միջին բիզնեսը փրկելու հույսեր դեռ կան: Եթե իշխանությունները խոստանան, որ իսկապես նոր օրենք չեն ընդունելու և նոր ռազմավարություն չեն մշակելու, մեկ էլ տեսար` ոլորտն ինքն իրեն ուշքի եկավ: Բայց արդյոք իշխանություններն այդքան ողջամիտ կլինե՞ն: