Երեկ երեկոյան, Թմրանյութերի չարաշահման և ապօրինի շրջանառության դեմ պայքարի միջազգային օրվա առթիվ, Շառլ Ազնավուրի անվան հրապարակում անցկացրվեց «Նկարում ենք կյանք» խորագրով ծրագիրը: Այն կազմակերպել էին Հայաստանի երիտասարդական հիմնադրամը և ՀՀԿ երիտասարդական կազմակերպությունը։

Ծրագրի հիմնական նպատակը թմրամոլության հետևանքների մասին բարձրաձայնելն է, երևույթի վրա հասարակության ուշադրությունը սևեռելը, քանի որ հաճախ երիտասարդների շրջանում ինֆորմացիայի պակաս կա։

«Թեև Հայաստանում վերջին տարիներին արձանագրվել է թմրամոլության աճ, սակայն հարևան հանրապետությունների հետ համեմատած՝ մեզ մոտ խնդիրն այնքան էլ մեծ չէ։ Բայց, այդուհանդերձ, խնդիրը մտահոգիչ է, և մենք ամեն ինչ պետք է անենք, որ ավելի ու ավելի քիչ երիտասարդներ դիմեն թմրամոլություն կոչվող չարիքին»,- նշեց Հայաստանի երիտասարդական հիմնադրամի հոգաբարձուների խորհրդի համակարգող, ԱԺ պատգամավոր Կարեն Ավագյանը։

«Նկարում ենք կյանք» ծագրի ժամանակ ելույթ ունեցավ «Արմենոիդս» խումբը։

Հայաստանի երիտասարդական հիմնադրամի հասարակայնության հետ կապերի ծառայության տեղեկացմամբ` ակցիայի ընթացքում Երևանի գեղարվեստի պետական ակադեմիայի և Երևանի Փ. Թերլեմեզյանի անվան պետական քոլեջի ուսանողների նկարած նկարները կտրամադրվեն բուժհաստատություններին։