Այսօր տեղի ունեցավ Արցախի կառավարության հերթական նիստը, որը վարում էր վարչապետ Արա Հարությունյանը:

Կառավարության հավանությանն արժանացան «Հողի հարկի մասին» և «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքներում առաջարկվող փոփոխություններն ու լրացումները: Վերջին օրինագծով հստակեցվում են լիազոր և տարածքային մարմինների լիազորությունները, և կարգավորվում հուշարձանների սեփականատերերի իրավունքները:

Գործադիրը հաստատեց Արցախի պետական բարձրագույն, նախնական մասնագիտական և միջին մասնագիտական ուսումնական հաստատությունների, ինչպես նաև ՀՀ բուհերում Արցախին հատկացվելիք 2013-14 ուսումնական տարվա բակալավրի և մագիստրոսի կրթական ծրագրերով անվճար, վճարովի և ուսման վարձի մասնակի զեղչի կիրառման իրավունքներով առկա և հեռակա ուսուցմամբ տեղերը:

Հնչեցին առաջարկություններ պահանջարկ ունեցող մասնագիտությունների գծով ՀՀ բուհերում պահուստային ֆոնդից տեղեր հատկացնելու վերաբերյալ: Նիստում սահմանվեց նաև ուսուցիչների ատեստավորման անցկացման կարգը: Մարտի 15-ից կսկսվի հանրապետության տարբեր դպրոցների շուրջ 900 ուսուցչի ատեստավորումը:

Մեկ այլ որոշում ընդունվեց' ելնելով զոհված (մահացած) զինծառայողների ընտանիքների անդամների՝ կերակրողին կորցնելու դեպքում զինվորական կենսաթոշակի փոխարեն ամենամսյա դրամական օգնության, ինչպես նաև որոշման այլ դրույթների կիրարկման ժամանակ առաջացած խնդիրների լուծման անհրաժեշտությունից:

Մինչ այժմ զոհված զինծառայողների ընտանիքների այն անդամներին, որոնց կերակրողին կորցնելու դեպքում զինվորական կենսաթոշակի փոխարեն սահմանված ամենամսյա դրամական օգնության իրավունքը ծագել է 2011թ. օգոստոսից հետո, Արցախի զինկոմիսարիատը կենսաթոշակ կամ դրա փոխարեն ամենամսյա դրամական օգնություն չի նշանակել՝ բյուջետավորման գործընթացի հետ կապված։ Որոշմամբ նախատեսվում է բավարարել այդ քաղաքացիների դրամական հասանելիքը, ովքեր կդիմեն և անհրաժեշտ բոլոր փաստաթղթերը կներկայացնեն մինչև 2013թ. մայիսի 1-ը:

Նաև հաստատվեցին 2013թ. գյուղական բնակչությանը մասնագիտացված բուժօգնության կազմակերպման ծրագիրը և ժամանակացույցը: Ծրագրի շրջանակներում հանրապետության գյուղական բնակչությունը տեղում կստանա բուժօգնություն: Այս մասին հայտնում է Արցախի կառավարության աշխատակազմի տեղեկատվության և հասարակայնության հետ կապերի բաժինը: