«Ժողովուրդը ոչ մի քայլ չի անելու առանց ինձ, և ես ոչ մի քայլ չեմ անելու առանց ժողովրդի»,-Ազատության հրապարակում այսօր հայտարարեց «Ժառանգության» առաջնորդ Րաֆֆի Հովհաննիսյանը: 

Սահմանադրական դատարանի որոշմանն անդրադառնալով` Րաֆֆի Հովհաննիսյանը նշեց, որ ՍԴ-ն տապալեց իր վերջին փորձությունը, և սրանից հետո ոչ միայն գործադիր, այլ դատական իշխանությունը պետք է ձևավորվի ժողովրդի կողմից: 

Ր. Հովհաննիսյանը ամոթանք տվեց ՀՀ արդարադատության նախարար Հրայր Թովմասյանին`  նշելով, որ ինչ գործ ունենր արդարադատության նախարարը պաշտպանելու այն կողմին, որը  կեղծել է ընտրությունները, նա պետք է պաշտպաներ ողջ ժողովրդի շահերը. «Ցավում եմ, Հրայր»,- հավելեց Րաֆֆի Հովհաննիսյանը: 

«Ժառանգության» ղեկավարն անդրադարձավ նաև Երևանի ավագանու ընտրություններին և հաստատեց, որ ինչպես մասնակցել են բոլոր ընտրություններին, այդ թվում` նախագահական, (և չնայած շատերը թերահավատ էին և չհավատացին ժողովրդին, ինքը հավատաց), մասնակցելու են նաև Երևանի ավագանու ընտրություններին, և այստեղ էլ «իշխանությունը լինելու է ժողովրդինը»: Հաջորդ հանրահավաքին խոստացավ ներկայացել ցուցակը: «Երևանի հաջորդ քաղաքապետը լինելու է մեզանից մեկը»,- ասաց Րաֆֆի Հովհաննիսյանը և նշեց, որ ինքը չի լինելու: 

Հանրահավաքը վարող Արմեն Մարտիրոսյանը ընթերցել էր Մայր Աթոռից այսօր ստացած նամակը, որտեղ Մայր Աթոռը վերստին հաստատում էր իր դիրքորոշումը և ճանաչում կայացած ընտրությունների արդյունքները: Րաֆֆի Հովհաննիսյանը ամոթանք տվեց այդ նամակի հեղինակներին: 

Վաղը` 17:00-ին Ազատության հրապարակում նախատեսված է ռոք համերգ-հավաք` «Որդան կարմիր» և «Ոստան Հայոց» խմբերի մասնակցությամբ:   

Կիրակի օրվանից սկսած` մինչև հինգշաբթի, Ազատության հրապարակում մեկնարկելու է քաղաքացիական ֆորումը` 17:00-ին, որը բերելու է գործադիր, դատական և օրենսդիր իշխանությունների ձևավորմանը: Ֆորումի առաջին բանախոսը Նիկոլ Փաշինյանն է:  Երկուշաբթի ֆորումի բանախոսը կլինի Անդրիաս Ղուկասյանը:   

Հաջորդ հանրահավաքը տեղի կունենա ուրբաթ` մարտի 22-ին` ժամը 18:00-ին, որտեղ առաջինը ելույթ կունենա Րաֆֆի Հովհաննիսյանը:

Լուսանկարը` Սոնա Սիմոնյանի