Քիչ առաջ ՀՀ ԱԺ-ում հարցուպատասխանի ժամանակ «Ժառանգության» խմբակցության պատգամավոր Զարուհի Փոստանջյանը վարչապետ Տիգրան Սարգսյանին հարց ուղղեց, թե արդյոք վերջինս պատրաստվում է գնալ մարտի 22-ին` ժամը 18:00-ին, Ազատության հրապարակում նախատեսված հաղթահավաքին: 

Վարչապետ Տիգրան Սարգսյանը պատասխանեց, որ ինքն այդ օրը չի մասնակցի Րաֆֆի Հովհաննիսյանի հանրահավաքին, քանզի իր աշխատանքային օրակարգը այլ կարևորագույն միջոցառումներով է լեցուն: 

Վարչապետը նշեց, որ Զարուհի Փոստանջյանը քաղաքական բանավեճը տեղափոխել է վիրավորանքների դաշտ. «Տեղին չէ այս հեղինակավոր դահլիճը դարձնել այդպիսի բանավեճի տեղ, ընդհանրապես նման ոճի վիրավորանքների, խոսակցության չի կարելի վերածել, դա վատ ճանապարհ է և շատ վատ տեղ է տանելու»,- ասաց վարչապետը և առաջարկեց քաղաքակիրթ ձևաչափի մեջ մնալ: 

Տիգրան Սարգսյանը նշեց, որ իրենք հարգալից են վերաբերում «Ժառանգության» ներկայացուցիչների տեսակետներին, գնահատականներին, և խնդրեց, որպեսզի իրենց քաղաքական թիմին, գնահատականներին նույնպես հարգանքով վերաբերվեն: 

«Փաստորեն, ես ճիշտ հասկացա` Ձեր մեջ արդեն մարել է հեղափոխական լինելու ցանկությունը»,- արձագանքեց Զարուհի Փոստանջյանը և հույս հայտնեց, որ հեղափոխությունը վարչապետի մեջ նորից կարթնանա: