«Ժողովուրդ». ԱԺ անունից միասնական հայտարարությո՞ւն
«Ժողովուրդ»-ի` ՀՀ Ազգային ժողովին մոտ կանգնած լավատեղյակ աղբյուրների փոխանցմամբ` ԱԺ մեծամասնության` Հանրապետական խմբակցության պատգամավորները մտադիր են արտահերթ նստաշրջան հրավիրելու նախաձեռնությամբ հանդես գալ:
Իսկ օրակարգում, ըստ նույն աղբյուրների, լինելու է մեկ թեմա`ՀՀ նախագահի ընտրություններն ու դրանց հաջորդած իրավիճակը, որը քննարկելուց հետո խորհրդարանական մեծամասնությունը մտադիր է ԱԺ անունից միասնական հայտարարություն ընդունել:
Ըստ «Ժողովուրդ»-ի աղբյուրների` ՀՀԿ-ում նույնիսկ հայտարարության նախագիծն է արդեն պատրաստվել, որն ուղարկել են ԱԺ խմբակցություններին` քննարկելու եւ առաջարկներ ներկայացնելու:
ԱԺ ՀՀԿ խմբակցության քարտուղար Հովհաննես Սահակյանը «Ժողովուրդ»-ի հետ զրույցում հաստատել է արտահերթ նստաշրջան հրավիրելու իրենց մտադրության մասին լուրերը: Ըստ քարտուղարի` մտահղացումը դեռ պետք է կողմերի հետ քննարկել:
Մեկնաբանել