ՀՀ փոխվարչապետ, տարածքային կառավարման նախարար Արմեն Գեւորգյանն այսօր խորհրդակցություն անցկացրեց Շիրակի մարզպետարանում, որին մասնակցում էին մարզպետ Ֆելիքս Ցոլակյանը, մարզպետարանի պատասխանատուներ: Քննարկվեցին մարզում իրականացվող ծրագրերի ընթացքին, համայնքներում սեփական եկամուտների հավաքագրմանը, գարնան գյուղատնտեսական աշխատանքներին, ոռոգման շրջանի մեկնարկին առնչվող հարցեր:

Փոխվարչապետին զեկուցվեց մարզում հողօգտագործողներին մատչելի գնով պարարտանյութ եւ դիզելային վառելանյութ տրամադրելու պետական ծրագրերի ընթացքի մասին: Նշվեց, որ աշխատանքներն իրականացվում են ըստ ժամանակացույցի: Ըստ մարզպետարանի պատասխանատուների` ծրագրերի իրականացումը նպաստել է մարզում ցանքատարածությունների ավելացմանը. մասնավորապես 2012 թ.-ին, նախորդ տարվա համեմատ, աշնանացան ցորենի ցանքատարածություններն ավելացել են 1 000 հեկտարով, իսկ գարնանացանի տարածքները նախատեսվում է, որ նախորդ տարվա ծավալները կգերազանցեն 1 500 հեկտարով: Տեղեկացվեց, որ մարզի համայնքներում որոշակի խնդիրներ են առկա կարտոֆիլի բերքի իրացման հետ կապված եւ անդրադարձ եղավ բերքն իրացնելու հնարավորություններին: Քննարկվեցին նաեւ մարզում անասնաբուծության, մասնավորապես, ոչխարաբուծության զարգացմանը վերաբերող հարցեր:

Անդրադառնալով ոռոգման շրջանի մեկնարկի հետ կապված հարցերին` փոխվարչապետը մարզպետարանի պատասխանատուներին առաջարկեց  «Շիրակ» ՋՕԸ-ի  հետ համատեղ ամփոփել 2012 թ. աշխատանքների արդյունքները եւ  աջակցել ՋՕԸ-ին ` անհրաժեշտ նախապատրաստական աշխատանքների իրականացման հարցում:

Տեղեկություններ ներկայացվեց մարզի առաջնահերթ խնդիրների լուծման չորրորդ ծրագրի ընթացքի մասին: Զեկուցվեց, որ ներկայումս ծրագրով իրականացված ֆիզիկական աշխատանքների ծավալը կազմում է 63 տոկոս: Չորրորդ ծրագրով եւս մարզին հատկացվել էր 1,3 մլրդ դրամ, որոնք ուղղվել են մանկապարտեզների, մշակույթի տների, համայնքային ճանապարհների, բազմաբնակարան շենքերի տանիքների նորոգմանը:

Ներկայացվեցին նաեւ մարզի համայնքների 2013թ. առաջին երկու ամիսների սեփական եկամուտների կատարողականի ցուցանիշները: Կատարողականը կազմել է 86,6 տոկոս`  նախորդ տարվա նույն ժամանակահատվածի համեմատ  արձանագրվել է 3,8 տոկոսի աճ: Դրական համարելով տարեսկզբի միտումները` փոխվարչապետը կարեւորեց սեփական եկամուտների ողջ ծավալով հավաքագրումը եւ անթույլատրելի համարեց տարվա ընթացքում ապառքների ու պարտքերի կուտակումը, ինչն առաջին հերթին դժվարություններ է ստեղծում հենց համայնքների համար:

Խորհրդակցությանը մարզպետը բարձրացրեց Գյումրի քաղաքում նոր դիահերձարանի կառուցման  հարցը` ծրագրի իրագործմանը նաեւ տեղական մասնակցության պատրաստակամություն հայտնելով: Փոխվարչապետն առաջարկեց նոր շենքի կառուցման նախագիծը քննարկել Հայաստանի սոցիալական ներդրումների հիմնադրամի հետ:

Փոխվարչապետն առանձին խորհրդակցություն անցկացրեց նաեւ Շիրակի մարզպետ Ֆ. Ցոլակյանի եւ Գյումրիի քաղաքապետ Ս. Բալասանյանի հետ, որի ընթացքում քննարկվեցին քաղաքի սեփական եկամուտների հավաքագրման ցուցանիշները: Քաղաքապետը բարձրացրեց նաեւ Գյումրիում  փողոցների բարեկարգման հարցը` նշելով, որ ձյան հալոցքից  հետո վերանորոգման խիստ անհրաժեշտություն է առաջացել, իսկ համայնքային միջոցները բավարար չեն  համապատասխան  աշխատանքների իրականացման համար, ուստի  քաղաքապետարանն այս հարցում  ակնկալում է կառավարության աջակցությունը: Փոխվարչապետը խոստացավ, որ հարցը  կքննարկվի կառավարությունում:

Անդրադարձ եղավ նաեւ «Գյումրին` ԱՊՀ մշակութային մայրաքաղաք» ծրագրի իրականացմանը: Փոխվարչապետը մարզպետին ու  քաղաքապետին հորդորեց համագործակցված աշախատել ՀՀ մշակույթի նախարարության հետ եւ կարեւորեց ծրագրով նախատեսված միջոցառումների պատշաճ մակարդակով իրականացումը:

Այս մասին հայտնում է ՏԿՆ հասարակայնության հետ կապերի բաժինը: