Րոպեներ առաջ նորվեգացի Մագնուս Կառլսենը սպիտակներով ոչ անակնկալ հաղթանակ տարավ իսրայելցի Բորիս Գելֆանդի նկատմամբ, որին առաջին փուլում հաղթել էր նաեւ սեւերով: Փաստորեն, 10 տուրից հետո հավակնորդների մրցաշարային աղյուսակը շարունակում է գլխավորել վարկանիշային առաջատարը: Մագնուսը ունի 7, իսկ Արոնյանը՝ 6,5 միավոր: Հիշեցնենք, որ Լեւոնը հետ ընկավ հենց Գելֆանդին պարտվելուց հետո: Իր հերթին Լեւոնին հետապնդում է Կրամնիկը, որն ունի 6 միավոր: Գելֆանդը, Գրիշչուկը եւ Սվիդլերը վաստակել են 4,5-ական, Իվանչուկը եւ Ռաջաբովը՝ 3,5-ական միավոր:  

Վաղը կկայանան 11-րդ տուրի Գրիշչուկ-Կառլսեն, Կրամնիկ-Ռաջաբով, Սվիդլեր-Արոնյան, Իվանչուկ-Գելֆանդ պարտիաները: Առաջին փուլում այս զույգերը ոչ-ոքի էին խաղացել, եւ միայն Կառլսենն էր սպիտակներով հաղթել Գրիշչուկին:  

14 տուրից բաղկացած մրցաշարը կավարտվի ապրիլի 1-ին, եւ հաղթողը աշխարհի չեմպիոնի թագը նոյեմբերին կվիճարկի գործող չեմպիոն, հնդիկ Վիշի Անանդի հետ: