Լեւոն Արոնյանն այսօր երկրորդ պարտությունը կրեց հավակնորդների լոնդոնյան մրցաշարում, եւ փաստորեն այլեւս իրատեսական չէ խոսել նրա հնարավորությունների մասին: Լեւոնը սեւերով պարտվեց Ռուսաստանի ներկայացուցիչ Պյոտր Սվիդլերին, որի հետ առաջին փուլում ոչ-ոքի էր խաղացել:

Լեւոնի հիմնական մրցակիցներից Մագնուս Կառլսենը սեւերով ոչ-ոքի խաղաց Ալեքսանդր Գրիշչուկի հետ, նույն ելքն ունեցավ Իվանչուկ-Գելֆանդ պարտիան: Իր հերթին Կրամնիկը սպիտակներով հաղթեց Ռաջաբովին եւ առաջ անցավ Արոնյանից:

Այս պահին 11 տուրից հետո Կառլսենը ունի 7,5, Կրամնիկը՝ 7, Արոնյանը՝ 6,5, Սվիդլերը՝ 5,5, Գելֆանդն ու Գրիշչուկը՝ 5-ական, Իվանչուկը՝ 4, իսկ Ռաջաբովը՝ 3,5 միավոր:

Վաղը կմրցեն Կառլսեն-Իվանչուկ, Գելֆանդ-Սվիդլեր, Արոնյան-Կրամնիկ, Ռաջաբով-Գրիշչուկ զույգերը:

Փաստորեն, մնացել է 3 տուր, որոնցում համաշխարհային առաջատար Կառլսենը դժվար թե բաց թողնի հիանալի հնարավորությունը, առավել եւս, որ այդ երեք պարտիաներից երկուսում նա խաղալու է սպիտակներով: