Վրաստանում ՀՀ դեսպան Հովհաննես Մանուկյանը օրերս հերթական այցելությունը կատարեց Սամցխե-Ջավախքի տարածաշրջան: Այցելության ընթացքում դեսպան Մանուկյանին ուղեկցում էր ՀԱԵ Վիրահայոց թեմի առաջնորդ Վազգեն եպիսկոպոս Միրզախանյանը:

 Ախալցիխեյի Սբ. Գրիգոր Լուսավորիչ եկեղեցում հայ բնակչությանն ուղղված խոսքում ՀՀ դեսպանը շնորհավորեց նախորդ կիրակի օրը տոնված Սբ. Հարության տոնի, ինչպես նաեւ ներկա տիկնանց եւ օրիորդներին՝ Մայրության եւ գեղեցկության տոնի առթիվ:

Դեսպան Մանուկյանի հաջորդ հանդիպումը տեղի ունեցավ Ախալքալաքում, ուր Ախալքալաքի եւ Նինոծմինդայի տեղական իշխանությունների հետ համատեղ կազմակերպվեց հանդիպում Սամցխե-Ջավախքի տարածաշրջանի հայաբնակ շրջանների հայկական կրթօջախների տնօրենների, ինչպես նաեւ մշակույթի ոլորտի գործիչների հետ:

Դեսպան Մանուկյանն ընդհանուր գծերով ներկայացրեց   հայ-վրացական   միջպետական  հարաբերությունների  ներկա  մակարդակը՝ հատկապես  կարեւորելով  երկկողմ   հարաբերությունները  կրթական  եւ մշակութային  բնագավառում,  խոսեց  դրանց  հեռանկարների  մասին, անդրադարձավ  Վրաստանի  հայ  համայնքի  հիմնախնդիրներին: 

ՀՀ դեսպանն ընդգծեց վիրահայ  համայնքի  եւ նրա ներկայացուցիչների ակտիվ եւ արդյունավետ ներգրավումը Վրաստանի հասարակական–քաղաքական, տնտեսական  եւ մշակութային    կյանքում,    ինչը   լրացուցիչ  խթան  կարող  է  դառնալ  ոչ  միայն համայնքային  հիմնախնդիրների  լուծման,  այլեւ  հայ-վրացական հարաբերությունների  հետագա   ամրապնդման   եւ    խորացման  համար:

Հանդիպման ավարտին դեսպան Մանուկյանը Սամցխե-Ջավախքի տարածաշրջանի մտավորականության, մշակութային եւ կրթական բնագավառի առավել աչքի ընկած եւ վաստակ ունեցող մի շարք գործիչների պարգեւատրեց Վրաստանում ՀՀ դեսպանության պատվոգրերով, շնորհակալագրերով եւ հուշանվերներով: Դեսպան  Մանուկյանը Ախալքալաքի  եւ Նինոծմինդայի   շուրջ ինը  տասնյակ հայալեզու կրթական օջախներին փոխանցեց ՀՀ մշակույթի նախարարության տրամադրած հայալեզու գեղարվետական գրքեր եւ այլ գրականություն: Գնահատանքի  եւ  օրհնության խոսքով հանդես եկավ Հայ Առաքելական Ուղղափառ եկեղեցու Վրաստանի թեմի առաջնորդ Գերաշնորհ Տ. Վազգեն եպիսկոպոս Միրզախանյանը:

Նույն օրը Ջավախքի ընդհանուր առաջնորդական փոխանորդությունում կայացավ դեսպան Մանուկյանի հանդիպումը շրջանի համայնքային, հոգեւոր եւ մշակութային կյանքում  ակտիվ  դերակատարություն ունեցող կանանց հետ: Շնորհավորելով հանդիպման մասնակիցներին Մայրության եւ գեղեցկության տոնի առթիվ՝ ՀՀ դեսպանը կարեւորեց կանանց անփոխարինելի դերը եւ ավանդը կրթական բնագավառում, մատաղ սերնդի դաստիարակության եւ այլ հարցերում: 

Նույն օրը երեկոյան Վրաստանում ՀՀ դեսպանը մասնակցեց Ախալքալաքի շրջանի Մերենիա  գյուղի  նոր վերանորոգված Սուրբ Աստվածածին եկեղեցու դռնբացեքի արարողությանը: Այս մասին տեղեկացնում է ԱԳՆ մամուլի ծառայությունը: