Տեսանյութեր
Լուսանկարներ
Քաղաքապետը շրջել է Քանաքեռ-Զեյթունում
Երևանի քաղաքապետ Կարեն Կարապետյանն այս անգամ ծանոթացավ Քանաքեռ-Զեյթուն վարչական շրջանում իրականացվող աշխատանքների ընթացքին, նախատեսվող ծրագրերին ու խնդիրներին: Առաջին խնդիրը, որ առաջադրվեց Կարեն Կարապետյանի կողմից, փողոցներին հարակից սիզամարգերի ու մայրուղիների միջանկյալ հատվածների կանաչ տարածքների խնամքը պատշաճ կազմակերպելն էր: Քաղաքապետը հանձնարարեց բարեկարգման ու կանաչապատման աշխատանքներ իրականացնել նաև «Հաղթանակ» զբոսայգու մուտքին հարող հատվածում:
Շրջայցի ընթացքում Կարեն Կարապետյանը ծանոթացավ նաև բակերում իրականացվող բարեկարգման ու խաղահրապարակների տեղադրման աշխատանքների ընթացքին: Որոշ բակային տարածքներում քաղաքապետը հանձնարարեց մաքրել բնակիչների կողմից ապօրինի հողազավթած տարածքներն ու փոխարենը բնակիչների համար հանգստի հարմարավետ գոտիներ ստեղծել: Վարչական շրջանի ղեկավարը տեղեկացրեց, որ գործընթացն արդեն սկսված է:
Մինաս Ավետիսյանի անվան այգին Քանաքեռ-Զեյթուն վարչական շրջանի բնակիչների ամենասիրված հանգստի գոտիներից մեկն է դարձել: Հանգստի կազմակերպման համար բոլոր պայմաններն այստեղ ապահովված են, քաղաքապետը հանձնարարեց առավել մեծ ուշադրություն դարձնել այգու խնամքին ու ընթացիկ սպասարկմանը: Կարեն Կարապետյանը եղավ նաև Դավիթ Անհաղթի անվան պուրակում, որի սպասարկումը մասնավոր ընկերություն է իրականացնում: Այստեղ ապահովված էին պարտադիր բարեկարգման նորմերն ու պայմանագրային պարտավորությունները:
Շրջայցից հետո քաղաքապետ Կարեն Կարապետյանն աշխատանքային խորհրդակցություն է անցկացրել վարչական շրջանի աշխատակազմի հետ: Անդրադառնալով աղբահանության կազմակերպման խնդիրներին` քաղաքապետը հանձնարարել է շարունակել պայմանագրային դաշտի կարգավորումը և ապահովել հավաքագրումների ցուցանիշը: Կարեն Կարապետյանն առաջարկել է գոյացած տնտեսումների հաշվին աղբահանության մեքենաների վրա տեղադրել GPS համակարգ, որպեսզի համաժամանակյա ռեժիմի միջոցով աղբահանության կազմակերպման ողջ գործընթացն առավել վերահսկելի և արդյունավետ լինի:
Վարձակալությամբ տրված տարածքների և ապօրինի ու չգործող կրպակների ապամոնտաժման մասով ևս քաղաքապետը տվել է մի շարք հանձնարարականներ:
Երևանի քաղաքապետարանի տեղեկատվության և հասարակայնության հետ կապերի վարչություն
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել