ՀՀ փոխվարչապետի, տարածքային կառավարման նախարարի պաշտոնակատար  Արմեն Գեւորգյանն այսօր այցելեց Վեդիի ապագա ջրամբարի կառուցման վայր` Արարատի մարզի Գոռավան համայնքի տարածքում:

Ոլորտի պատասխանատուների ուղեկցությամբ  Ա. Գեւորգյանը  ծանոթացավ ապագա ջրամբարի տեղանքին, քննարկվեցին ջրածածկ տարածքի,  ջրամբարի կառուցման հետ կապված մի շարք  հարցեր:  

Ջրամբարի կառուցման ծրագրի իրականացման համար հայկական կողմը ներկայումս բանակցություններ է վարում Զարգացման ֆրանսիական գործակալության հետ:

Նախատեսվում է Վեդի գետի վրա կառուցել 20 մլն խմ ընդհանուր ծավալով, 70 մ պատվարի բարձրությամբ ջրամբար: Այն հնարավորություն կտա շուրջ  2744 հա հողատարածքի ոռոգումն իրականացնել ինքնահոս եղանակով` ներկայիս մեխանիկականի փոխարեն: Արդյունքում մի շարք ջրհան կայաններ կհանվեն շահագործումից, ինչը կնպաստի նաեւ համակարգի առավել արդյունավետ գործունեությանը:

Այս մասին հայտնում է ՏԿՆ հասարակայնության հետ կապերի բաժինը: