Ազգային անվտանգության խորհրդի քարտուղար Արթուր Բաղդասարյանը «Հետքի» հետ զրույցում ասաց, որ տեղյակ են ՄԱԿ-ի Անվտանգության խորհրդի 1973 բանաձևի համաձայն ստեղծված փորձագետների խմբի 2013թ. փետրվարի 15-ի զեկույցին, որը նվիրված է Լիբիայի դեմ պատժամիջոցների կիրառման հարցերին:

«Նշված զեկույցը հրապարակվել է ՄԱԿ-ի կայքեջում, և մենք ծանոթացել ենք փաստաթղթի բովանդակությանը: Վերոնշյալ զեկույցի ուսումնասիրությունը, այդ թվում` Հայաստանին հնարավոր առնչության տեսանկյունից, ի հակառակ որոշ ԶԼՄ-ներում շրջանառվող լուրերի, ցույց է տալիս, որ դրանում չկա որևէ ձևակերպում Հայաստանի Հանրապետության կողմից Լիբիային զենք կամ զինամթերք մատակարարելու վերաբերյալ»,-ասաց Արթուր Բաղդասարյանը:

Նրա ասելով` զեկույցում, խոսքը վերաբերում է Լիբիա ռազմական նշանակության ապրանքների տեղափոխմանը, և այդ համատեքստում հիշատակվում են տարբեր երկրներում գրանցված մի շարք մասնավոր ընկերություններ, այդ թվում` նաև հայաստանյան գրանցում ունեցող երկու ընկերություն:

«Նշված ընկերությունների առնչությամբ փորձագետների խմբի կողմից արվել է համապատասխան հարցում, ի պատասխան որի` ՀՀ կողմից տրամադրվել են այդ ընկերություններին վերաբերող բոլոր անհրաժեշտ տեղեկությունները: Ուզում եմ ավելացնել, որ Հայաստանի Հանրապետությունը մշատապես հետևողական մոտեցում է ցուցաբերել է ՄԱԿ-ի ԱԽ որոշմամբ կիրառվող պատժամիջոցների պահպանման գործում»,-ավելացրեց Արթուր Բաղդասարյանը:  

Նշենք, որ մամուլում լուրեր էին տարածվել, թե 12 երկիր խախտել են միջազգային արգելքը եւ Քադաֆիին մատակարարել են ծանր ռազմատեխնիկա ու պայթուցիկներ: Ըստ հրապարակումներին`այդ երկրների թվում է նաև Հայաստանը: