Մարզերից ստացվող տեղեկությունների համաձայն՝ իշխանություններն այս տարի որոշել են սելավների ինքնահոս ջրերի համար գյուղացիներից գումարներ գանձել: Նախկինում գյուղացիներն այդ ջրերն օգտագործում էին անվճար:

«ՉԻ» - Չի կարելի միանշանակ պնդել, թե այս նորամուծության հեղինակը Հայաստանի իշխանություններ են: Եթե հիշում եք, «Չիպոլինոյի արկածները» հեքիաթում նույնպես իշխանությունները անձրևի համար հարկ են սահմանում, ընդ որում՝ հորդառատ անձրևի համար առանձին, սովորական անձրևի համար՝ առանձին, և այլն:

Հարց է ծագում. ինչո՞ւ նույնը չանել նաև Հայաստանում: Ճիշտ է՝ մեզանում դա ավելի մեղմ է արվում. անձրևի կաթիլներն օդում օգտագործելը ձրի է, բայց հենց որ թափվեց գետնին և սկսեց հոսել, արդեն վճարովի է:

Ի դեպ, լավ է, որ Հայաստանի իշխանությունները «Չիպոլինոյի արկածներն» ուշադիր չեն կարդացել: Այնտեղ նաև օդի հարկ էր սահմանվել: Ընդ որում, սինյոր Պոմիդորը բողոքում էր, որ օդի հարկը բարձրացնելուց հետո ժողովուրդը չարամտորեն սկսել է ավելի քիչ շնչել: Բայց Հայաստանում այդպիսի պրոբլեմ հաստատ չէր լինի: Մեր հարկայինը ձևը կգտներ: Այնպես որ, հարկային բարեփոխումները կարող են շարունակվել: