Շիրակի մարզի ընդհանուր իրավասության դատարանում վերջին շրջանում խստացված միջոցառումներ իրականցվում են միայն Կարեն Եսայանի սպանության գործով ընթացող դատական նիստերից առաջ: Կարգադրիչները ստուգում են դահլիճ մուտք գործող անձի ինքնությունը, պայուսակի պարունակությունը, կտրող-ծակող առարկաների առկայությունը: Անձը հաստատող փաստաթուղթ ամեն անգամ պահանջում են նաեւ նիստը լուսաբանող լրագրողներից:

Ապրիլի 19-ին Շիրակի մարզի ընդհանուր իրավասության դատարանի թիվ 5 դահլիճում նախագահությամբ Հ. Մովսեսյանի պիտի լսվեր 2012 թ.-ի հոկտեմբերին Գյումրու Խրիմյան Հայրիկ փողոցում 22-ամյա Հակոբ Քեչեջյանին վրաերթի ենթարկած Ռոլանդ Հովհաննիսյանի գործը: Վրաերթի ենթարկված երիտասարդը բազմաթիվ վնասվածքներով սկզբում տեղափոխվել էր Գյումրու Գյուլբենկյանի անվ. վիրաբուժական հիվանդանոց, այնուհետեւ՝ Երեւանի «Էրեբունի» հիվանդանոց, որտեղ էլ գիտակցության չգալով մահացել էր 2013 թ.-ի հունվարի 3-ին: Տղայի ծնողները դատարան դիմել էին մարտի 15-ին: Հարթաշենի բնակիչ, 52-ամյա Ռոլանդ Հովհաննիսյանին մեղադրանք էր առաջադրվել Քր. օրենսգրքի 242 հոդվածի 2-րդ մասով՝ վրաերթ:

Ապրլի 8-ին այս գործով նախատեսված դատական նիստը հետաձգվել էր: Հաջորդ նիստը նշանակվել էր ապրիլի 19-ին: Այդ օրը՝ ժամը 10-ին, ամբաստանյալ Ռոլանդ Հովհաննիսյանը (նրա նկատմամբ դատարանը որպես խափանման միջոց ընտրել էր ստորագրությունը չհեռանալու մասին) կնոջ հետ եւ մահացած տղայի ծնողները ներկայացել էին դատարան, սակայն նիստի սկիզբը ձգձգվել էր: Մահացած երիտասարդի հայրը՝ Պետրոս Քեչեջյանը, կնոջ՝ Անահիտ Արոսյանի պատմելով, շատ հուզված է եղել ու կորցնելով ինքնատիրապետումը՝  հարձակվել է ամբաստանյալի վրա ու դանակահարել: Քաշքշոցից առաջացած աղմուկից անհանգստացած ներս են վազել դատական կարգադրիչներն ու կանխել Քեչեջյանի հետագա գործողությունները:

«Ես չեմ արդարացնե ամուսնուս արարքը, բայց մեզի էլ բդի մարդիկ հասկնան: Ես իմ մինուճարին եմ կորցրել: Հեշտ է ըդքան, պահես մեծացնես ու… իրանք էնքան անմարդկային գտնվան, օր ըդքան բանն էղել էր, իմ տղես 3 ամիս հիվանդանոցն էր պառկած անգիտակից, մե օրմ չեկան հարցնեին, թե ինչխ եք, ինչի կարիք ունեք: Մենք տղուս մահը շատ վատ տարանք: Ով էլ էղներ վատ կտաներ: Դատարանի դեպքն էլ օր էղավ, ամուսնուս ներվերը չէին դիմացել, հետո ընձի ըսավ, օր աչքի առաջ Հակոբս է եկել, ու չի իմացել, թե ինչխ է հարձակվել Ռոլանդի վրա»,- պատմում է Անահիտ Ասոյանը:

Անահիտը հայտնեց, որ ամուսինը հաշվառված է Գյումրիի Հոգեկան առողջության կենտրոնում՝ նեւրոզ հիվանդություն ախտորոշմամբ: Անահիտը Պետրոսի երկրորդ կինն է, ու Հակոբը համատեղ ամուսնության միակ ծնունդը: Զինված ուժերում ծառայությունն ավարտելուց հետո Հակոբը վերադարձել էր հայրենի քաղաք ու 2 տարի առաջ բարձրագույն կրթություն ստանալու նպատակով ընդունվել Գյումրիի մանկավարժական ինստիտուտի ֆիզկուլտուրայի բաժինը: «Ինքն էդ օրը՝ ժամը 14:30-ին, վազքի պարապմունք ուներ: Տղես խմբի ավագն էր, վազել է խմբի առջեւից: Փողոցի վրա մի հատ շուն վրա է տվել տղուս: Երեխեն վախեցել է ու ավելի բանուկ մասն է վազել փողոցի, վերեւից եկող ավտոն էլ արագ է էղել՝ խփել է: Հետո մեզի պատմեցին, օր տղուս խփել-գցելուց հետո ավտոն 200 մետր գնացել է, նորից հետ է տվել, բայց փոխանակ տղուս հիվանդանոց հասցնեն, շոֆերին՝ Ռոլանդին են տարել: Ըսել է սիրտս վատ է, ընձի տարեք հիվանդանոց»,- նեղսրտում է Անահիտը:

Մահացած երիտասարդի մայրը կասկածում է, որ մեքենայի ղեկին ոչ թե Ռոլանդն է եղել, այլ նրա տղան: Պարզապես հայրը մեղքն իր վրա է վերցրել: «Բայց էսքան բանից հետո էլ Ռոլանդը չի ընդունե, օր մեղավոր են: Իմ ամուսնուս ահավոր հուներից հանել էր իրանց պահվածքը՝ անտարբեր, անխիղճ: Ես տղուս հետ հիվանդանոցները կտանջվեի, էդ ընթացքում Ռոլանդն իրա տղու պսակն էրեց: Մարդիկ հանգիստ խղճով հարսնիք կենեին, բայց մե օրմ չեկան տեսնեին, թե իրանց մեղքով կոմայի մեջ հայտնված ջահել տղեն ինչխ է»,- հուզված պատմում է Անահիտը:

Կնոջ փոխանցմամբ՝ ամուսնու մոտ ոչ թե դանակ է եղել, որով հարվածել է ամբաստանյալին, այլ մի քանի իրերից բաղկացած կոմպակտ մի գործիք, որի մեջ եղել է նաեւ փոքրիկ դանակ: «Ամուսինս հատուկ նպատակ չուներ իրան վնասելու: Ընձի ըսավ, թե բդի էրթամ մե հատմ վախեցնեմ, էլ չեմ դիմանա, տղես աչքիս դեմը գուկա»,- պատմում է Անահիտ Արոսյանը:

Քրեական գործ Պետրոս Քեչեջյանի դեմ դեռ չի հարուցվել, սակայն նյութեր նախապատարստվում են: Սպասում են բժշկափորձագիտական եզրակացության, որը պիտի պատասխան տա, թե արարքը գործելիս անձը աֆեկտի վիճակում եղել է, թե ոչ: