ՀՀ փոխվարչապետի, տարածքային կառավարման նախարարի պաշտոնակատար  Արմեն Գեւորգյանի ղեկավարությամբ ապրիլի 20-ին Տարածքային կառավարման նախարարությունում տեղի ունեցած խոհրդակցությանը քննարկվեցին ոռոգման շրջանի մեկնարկին, համակարգի նախապատրաստվածությանը վերաբերող հարցեր: Խորհրդակցությանը մասնակցում էին ՏԿՆ Ջրային տնտեսության պետական կոմիտեի, Ջրառ եւ Ջրօգտագործող ընկերությունների (ՋՕԸ) ղեկավարներ:

ՋՕԸ-երի ղեկավարները տեղեկություններ ներկայացրեցին կատարված նախապատրաստական աշխատանքների մասին, քննարկվեցին, մասնավորապես, պոմպակայանների վերանորոգման եւ տեխնիկական շահագործման, ջրամբարներում կուտակված ջրային պաշարների հետ կապված հարցեր: 

Զեկուցվեց, որ ոռոգման շրջանն արդեն մեկնարկել է Արարատյան դաշտավայրում, ոռոգման նախապատրաստական աշխատանքները գրեթե ավարտված են հանրապետության նախալեռնային շրջաններում, իսկ լեռնային շրջաններում համակարգը ոռոգմանը պատրաստ կլինի առաջիկա օրերին: 

Ա. Գեւորգյանը կարեւորեց ոռոգման նախապատրաստական աշխատանքների ճիշտ կազմակերպումը` գյուղացիական տնտեսություններին ժամանակին եւ  պահանջարկին  համապատասխան  ջրամատակարարում ապահովելու համար: Նա առանձնահատուկ անդրադարձավ նաեւ համակարգի անխափան գործունեության ապահովման խնդրին` կարեւորելով մատակարարված ջրի հաշվառման, ձեւավորված հասույթների դիմաց վարձավճարների ժամանակին եւ ամբողջական հավաքագրման աշխատանքների իրականացումը:

Ա. Գեւորգյանը նշեց, որ մի քանի օր առաջ անձամբ է ծանոթացել ջրամբարների ընդհանուր վիճակին, ջրակուտակման ծավալներին, պատասխանատուների հետ քննարկել հետագա կուտակման հնարավորությունները: Նա նշեց, որ ներկայումս կուտակված ծավալները դեռեւս բավարար չեն պնդելու, որ լարվածություններ չեն առաջանա, ուստի ոռոգման շրջանի հենց սկզբից պետք է առավելագույնս խնայողաբար ջրամատակարարում իրականացնել:

Ա. Գեւորգյանը նաեւ առանձնահատուկ ընդգծեց  ՋՕԸ-ի կառավարման խորհուրդների  աշխատանքների արդյունավետության  բարձրացման անհրաժեշտությունը` նշելով, որ այնտեղ պետք է քննարկման առարկա դառնան կարեւոր  հարցերը, իսկ  նրանց գործունեությունը պետք է  թափանցիկ լինի  հանրության համար: Նա նաեւ ընդգծեց ՋՕԸ-ջրօգտագործող հարաբերություններում  կանխիկ վճարումների երեւույթը բացառելու, ինչպես նաեւ բոլոր գանձումները բացառապես ջրօգտագործողների հետ կնքված պայմանագրերի համապատասխան իրականացնելու  անհրաժեշտությունը:

Ոռոգման աշխատանքների արդյունավետ կազմակերպման համար Ա. Գեւորգյանն առաջնային համարեց նաեւ համակարգի  ֆինանսական կայունության ապահովման հարցը` ՋՕԸ-երի ղեկավարներին հորդորելով բացառել ծախսերի ավելացումը եւ աշխատանքներն իրականացնել հաստատված բյուջեների սահմաններում: 

Այս մասին հայտնում է ՏԿՆ հասարակայնության հետ կապերի բաժինը: