ՀՀ վարչապետ Տիգրան Սարգսյանը կառավարության ապրիլի 18-ի նիստին անդրադարձել էր գնումների ոլորտին: Ըստ նրա` հսկող մարմինները հայտնաբերել են, որ շատ հաճախ որոշ ապրանքատեսակների ձեռքբերման գինը մրցույթով լինում է ավելի բարձր, քան այդ պահին խանութում վաճառվող գինը:

«Եթե դուք ուզում եք ինչ-որ առանձնահատուկ գրիչ առնել կամ առանձնահատուկ թուղթ, պետք է հիմնավորեք դա։ Ինչո՞ւ է կարևոր տիպաբանությունը, որովհետև դրա վրա շատ հաճախ խաբեություն է կատարվում. ասում են, որ այսինչ շտրիխը փոխվեց, դրա համար էլ գինը բարձրացավ, հիմա այդպիսի խորամանկություն այլևս թույլ չենք տալու»,-ասել էր վարչապետը:

Պարզվում է՝ գրչի «բիզնեսը». կամ վարչապետի բնորոշած՝ խաբեությունը տարիներ շարունակ լավ էլ աշխատել է: Միայն գրչի օրինակով կարելի է ցույց տալ, թե որոշ գերատեսչություններ ինչպես են անխնա ծախսում պետական միջոցները եւ դրա համար մնում անպատիժ:

Ուսումնասիրելով 2012-2013թթ  «Հայաստանի Հանրապետության 2013 թվականի պետական բյուջեի մասին» ՀՀ օրենքով սահմանված բյուջետային հատկացումների հաշվին իրականացվող գնումների անվանացանկը՝ պարզվեց, որ անցյալ տարի ՀՀ նախագահի աշխատակազմի համար նախատեսված է եղել 1200 դրամանոց 100 հատ գրիչ:

Միգուցե վարչապետ Տիգրան Սարգսյանը զարմանա, բայց կառավարության աշխատակազմը եւս գրիչների «սիրահար» է: Անցյալ տարի աշխատակազմի համար նախատեսված է եղել 1000 դրամ արժողությամբ 1000 հատ գելով գրիչ:

Այս տարի էլ միայն 700 հատ գրիչ ձեռք բերելու համար հատկացվել է 525 հազար դրամ` 1 գրչի արժեքը նախատեսելով 750 դրամ: Իհարկե, գրչի համար սա միակ հատկացումը չէ:

Հովիկ Աբրահամյանի ղեկավարած Ազգային ժողովի աշխատակազմը եւս հետ չի մնում թանկարժեք գրիչով աշխատելու գայթակղությունից: Այս տարվա պետական բյուջեով 900-դրամանոց 210 հատ գրիչ ձեռք բերելու համար հատկացվել է 189 հազար դրամ:

900-դրամանոց 20 գրիչ էլ կգնի ՀՀ  գլխավոր դատախազության աշխատակազմը: 900 -դրամանոց 100 հատ գրիչ էլ նախատեսված է եղել անցյալ տարվա պետական բյուջեով:

Հատուկ քննչական ծառայության համար ինչպես նախորդ, այնպես էլ այս տարի հատկացված է 50 հազար դրամ` 50 հատ 1000-դրամանոց գրիչ ձեռք բերելու համար: Գրիչների մասը հատուկ քննչական ծառայությունը կարծես թե «copy past» է արել նախորդ տարվա պետական բյուջեից, քանի որ ավելի էժան գրիչների գներն ու քանակը նույնությամբ կրկնվում են, օրինակ` 220-դրամոց 300 հատ գրիչ նախատեսված է եղել թե՛ նախորդ տարի, թե՛ այս տարի:

Տարածքային կառավարման նախարարությունը եւս անմասն չի մնում «գրչային մարաթոնից»: Անցյալ տարի 900-դրամանոց 68 եւ 1000-դրամանոց 120 հատ գրիչ է նախատեսված եղել աշխատակազմի համար: Այս տարի էլ 900-դրամանոց 120 հատ գրիչ կունենա նախարարությունը, որի համար հատկացվել է 108 հազար դրամ:

Քրեակատարողական համակարգի պահպանման համար նախատեսված ապրանքների մեջ նշված է նաեւ 500-դրամանոց 200 հատ գրիչ` 100 հազար դրամ ընդհանուր արժեքով:

Բնապահպանության նախարարությունը այս տարի ձեռք կբերի 20 հատ գրիչ` յուրաքանչյուրը 1100 դրամ արժողությամբ: Շրջակա միջավայրի պաշտպանության համար նախատեսված ապրանքների ցանկում էլ նախատեսվել է 1100-դրամանոց 10 հատ գրիչ:

Նախարարության աշխատակազմի համար անցյալ տարի նախատեսված է եղել 950-դրամանոց 20 հատ գրիչ: Նույնքան էլ նախատեսված է եղել «Շրջակա միջավայրի պաշտպանության» համար:

Պաշտպանության նախարարության համար 200 հատ 800-դրամանոց գրիչ է այս տարի նախատեսված, իսկ 100 գրիչ էլ՝ 600-դրամ արժեքով:

Գագիկ Բեգլարյանի ղեկավարած տրանսպորտի եւ կապի նախարարության աշխատակազմն այս տարի կունենա 850-դրամանոց 40 հատ գրիչ, իսկ եւս 50-ը` 700-դրամանոց կլինի: Ենթադրվում է, որ այս գրիչները նախատեսված են նախարարության «վերնախավի» համար: Հասարակ աշխատողների մասին եւս հոգացել են. նրանց համար կգնեն 80-դրամանոց 20 հատ գրիչ:

Անցյալ տարի այս նախարարության համար եւս 50 հատ 850-դրամանոց գրիչ է նախատեսված եղել պետական բյուջեով:

Քաղաքաշինության նախարարությունում  նույնպես սիրում են թանկարժեք գրիչով աշխատել: Աշխատակազմին նման «հաճույք» պատճառելու համար այս տարի կգնեն 8 հատ 1000-դրամանոց գրիչ, 12 հատ` 850-դրամանոց, 11 հատ` 854- դրամանոց:

Իսկ անցյալ տարի նախատեսված է եղել 2500-դրամանոց` 4, 1000 -դրամանոց` 9, 950-դրամանոց` 24, 850-դրամանոց` 20 եւ 360-դրամանոց` 60 հատ գրիչ:

Սպորտի եւ երիտասարդության հարցերով նախարարությունում հավանաբար 9 մարդ կգրի 900-դրամանոց գրչով, իսկ 11-ը` 1500-դրամանոցով:

Նույն նախարարության «Հանգիստ, մշակույթ եւ կրոն» բաժնի համար 300 հատ գնդիկավոր գրիչ է նախատեսված` 700 դրամ արժեքով: Նույն արժեքով կգնեն նաեւ 250 հատ «ոչ գնդիկավոր» գրիչ:

160 հատ գրիչ կգնեն 900 դրամով, 153 հատը` 1200 դրամով, իսկ 100-ը` 1500 դրամով:

Ուշագրավ է, որ 2012թ. պետական բյուջեով նույն նախարարության համար նախատեսված է եղել 20 հատ 1000- դրամանոց գրիչ, 63 հազար  400- դրամանոց՝ 1 գրիչ, 7 հազար 700- դրամանոց՝ 10 գրիչ, 7 հազար 800-դրամանոց` 10, 4 հազար 750-դրամանոց` 10 եւ 15 հազար դրամանոց 10 հատ գրիչ:

Արտակարգ իրավիճակների նախարարության ենթակայության տակ գործող «Փրկարար ծառայության համակարգի ստորաբաժանումների պահպանման» համար, ի թիվս այլ ապրանքների, հատկացվել է 1200-դրամանոց 70 եւ 400 դրամ արժողության 500 գրիչ:

Նախարարության համար անցյալ տարի նախատեսված է եղել 200 հատ 850-դրամանոց գրիչ, որոնց ընդհանուր արժեքը կազմել է 170 հազար դրամ: Իսկ «Փրկարար ծառայության համակարգի ստորաբաժանումների պահպանման» համար` 1200-դրամանոց 50 հատ գրիչ:

Այս տարի սփյուռքի նախարարությունը կունենա 130 հատ 650-դրամանոց գրիչ՝ նախորդ տարվա 155-ի փոխարեն:

Հանրային ծառայությունները կարգավորող հանձնաժողովին նախորդ տարի հատկացված էր 5 հատ 1200-դրամանոց գրիչ, իսկ այս տարի`10 հատ:

Ինչպես 2012-ին, այնպես էլ այս տարի բյուջեով հանձնաժողովի համար նախատեսված է 25 հատ 850-դրամանոց գրիչ:

Կենտրոնական ընտրական հանձնաժողովում այս տարի կօգտագործեն 60 հատ 1000- դրամանոց գրիչ, իսկ Տնտեսական մրցակցության պաշտպանության պետական հանձնաժողովում` 50 հատ 1200-դրամանոց:

ՀՀ կրթության և գիտության նախարարության գիտության պետական կոմիտեում 1000 -դրամանոց գրիչների թիվը 27-ն է, իսկ 800-դրամանոցներինը` 20:

Ազգային անվտանգության ծառայությանը բյուջեով միայն 1 մլն 540 հազար դրամ նախատեսված է 200 հատ գրիչ գնելու համար, որոնցից յուրաքանչյուրն արժե 7 հազար 700 դրամ: Պարզվում է, ԱԱԾ-ում «քչով» էլ են բավարարվում. 200 հատ «Յունի-բոլլ» անվանումով գրիչ ձեռք կբերեն 800 դրամով:

Նշենք, որ անցյալ տարվա պետբյուջեով ԱԱԾ-ի համար նախատեսված էր 850-դրամանոց 150 հատ, ինչպես նաեւ 35-դրամանոց՝ 20 հազար գրիչ:

Վերահսկիչ պալատը եւս 1000-դրամանոց գրչի «վայելքը» կզգա, ընդ որում` 120 անգամ: Իսկ Ազգային անվտանգության խորհուրդը` 50 հազար դրամով կգնի 50 հատ 1000-դրամանոց գրիչ:

Ինչպես միշտ մարզպետների մեջ առանձնանում է Սյունիքի մարզպետ Սուրիկ Խաչատրյանը եւ գրիչների հարցում բացառություն լինել հնարավոր չէր: Այդ մարզպետարանի աշխատակազմի համար նախատեսված է 10 հատ 1000-դրամանոց գրիչ: