«Մոսկվայի տան» տնօրեն Արմինե Թութունջյանը ԱԺ նախագահ Հովիկ Աբրահամյանին եւ էթիկայի հանձնաժողովին դիմում-բողոք է ներկայացրել` ընդդեմ ՀՀԿ խմբակցության պատգամավոր Նաիրա Կարապետյանի:

Ա. Թութունջյանը էթիկայի հանձնաժողովից խնդրում է քննարկել պատգամավորի վարքը` որպես պատգամավորի եւ կնոջ:

«Մոսկվայի տան» տնօրենի հետ կապ հաստատել չհաջողվեց, սակայն մամուլում լուրեր տարածվեցին, որ Ռուսաստանի դեսպանատունը Հայաստանում իրականացնում է կրթաթոշակի ծրագիր եւ գյումրեցի մի քանի ուսանողներին կրթաթոշակ տալու համար պատգամավոր Նաիրա Կարապետյանը զանգահարել եւ սպառնացել է նրան ու անվայելուչ խոսքեր ասել:

Նաիրա Կարապետյանը «Հետքի» հետ զրույցում ասաց, որ «Մոսկվայի տան» տնօրենի հետ բոլորովին այլ խոսակցություն է ունեցել, եւ դա կապված չի եղել ոչ կրթաթոշակների եւ ոչ էլ ուսանողների հետ:

«Շատ ցավում եմ, որ նման պաշտոն զբաղեցնող կինը զբաղվում է ապատեղեկատվություն եւ սադրանք տարածելով, սակայն ուրախ եմ, որ նա, այնուամենայնիվ, դիմել է ոչ թե այն ոճին եւ տոնայնությանը, որով ինձ հետ էր խոսում, այլ՝  էթիկայի հանձնաժողով: Էթիկայի հանձնաժողովն է այն մարմինը, որը կոչված է նման իրավիճակները պարզաբանելու եւ հանրությանը իրականությունը ներկայացնելու»,- ասաց Նաիրա Կարապետյանը:

Ըստ «Ազգային ժողովի կանոնակարգ» օրենքի՝ էթիկայի հանձնաժողովի նիստերը տեղի են ունենում դռնփակ` բացառությամբ այն դեպքի, երբ դիմումում նշված պատգամավորն առաջարկում է հանձնաժողովի նիստերն անցկացնել դռնբաց: Նաիրա Կարապետյանն ասաց, որ սա այն դեպքն է, որ առաջարկի նիստն անցկացնել դռնբաց, որպեսզի բոլորին պարզ լինի, թե իրականում ինչ է կատարվել: