2010 թ. նոյեմբերին Վանաձորի Տիգրան Մեծի պողոտայում գտնվող «Օազիս» սրճարանի դիմաց կրակոցներ էին եղել, որի արդյունքում վանաձորի բնակիչ Արսեն Փերիխանյանը ստացել էր կյանքի համար վտանգավոր ծանր մարմնական վնասվածքներ ոտքի ազդրի և պոչուկային շրջաններում: Դեպքի առթիվ նույն օրը հարուցվել էր քրեական գործ` Քր. օր.-ի 118-րդ հոդվածի 2-րդ մասի 9-րդ կետով` դիտավորությամբ առողջությանը  ծանր վնաս պատճառելը` խուլիգանական դրդումներով, և 235-րդ հոդվածի 1-ին մասով` ապօրինի կերպով հրազեն կրելը: Որոշում էր կայացվել Շալիկո Մանուչարյանին ներգրավել որպես մեղադրյալ, խափանման միջոց էր ընտրվել կալանավորումը, և հայտարարվել էր հետախուզում: Այդ հիմքով քրեական գործով վարույթը կասեցվել էր:

2012 մայիսի 30-ին Շալիկո Մանուչարյանը հայտանբերվեց և կալանավորվեց: Նախաքննությունն սկզբում Լոռիում էր իրականացվում, հետո տեղափոխվեց Շիրակ, ապա նորից` Լոռի:  8 ամիս մեղադրյալին կալանքի տակ պահելուց հետո այս տարվա հունվարի 28-ին Լոռու մարզի դատախազության որոշմամբ խափանման միջոց կալանավորումը փոխվեց ստորագրությամբ:  Ընդ որում` դրանից մի քանի օր առաջ  նախաքննական մարմինը դիմել էր դատարան` կալանքը ևս 2 ամսով երկարացնելու միջնորդությամբ: Եվ դրան հակառակ` նախաքննական մարմնի վերադասը, նախաքննության նկատմամբ վերահսկողություն իրականացնողն իր որոշմամբ փոխեց խափանման միջոցը:  Որոշման մեջ ձևակերպում կար, որ դեռևս ձեռք չեն բերվել բավարար ապացույցներ գործը մեղադրական եզրակացությամբ դատարան ուղարկելու համար:

«Բնականաբար այստեղ բազմաթիվ հարցեր են առաջանում` եթե չկար, ինչու էիք այսքան ժամանակ կալանքի տակ պահում, և ինչու վերջին անգամ նորից կալանքի ժամկետը երկարաձգելու միջնորդությամբ հանդես եկանք դատարանում,-նկատում է Շալիկո Մանուչարյանի շահերի պաշտպան Ռուբեն Հակոբյանը,-Այնուամենայնիվ փոխվեց խափանման միջոցը: Առայսօր նախաքննությունը շարունակվում էր, մի քանի անգամ ինձ ու պաշտպանյալիս էլի հրավիրեցին, դատավարական փաստաթղթերին ծանոթացան: Ի վերջո արդարությունը հաղթեց:

Ապրիլի 12-ին գործը քննող ավագ քննիչ Ռուդիկ Մինասյանը որոշում է կայացրել Շալիկո Մանուչարյանի նկատմամբ քրեական հետապնդումը դադարեցնելու մասին` հանցակազմի բացակայության հիմքով: Վերացվել է ընտրված խափանման միջոց ստորագրությունը: Որպես  հիմնավորում նշվել է, որ օբյեկտիվ, բազմակողմանի քննության արդյունքում բավարար արդյունքներ ձեռք չեն բերվել Շալիկո Մանուչարյանի կողմից Արսեն Փերիխանյանի վրա կրակելու, նրա առողջությանը ծանր վնաս պատճառելու վերաբերյալ, և սպառվել են այդ ուղղությամբ նոր ապացույցներ ձեռք բերելու բոլոր հնարավորությունները, ուստի նրա արարքում բացակայում է հանցակազմը:

Շալիկո Մանուչարյանի նկատմամբ քրեական հետապնդումը դադարեցվել է արդարացման հիմքով: Ուստի` Քր. դատ օր.-ի 66-րդ հոդվածի համաձայն` Շալիկո Մանուչարյանը ձեռք է բերել արդարացվածի դատավարավական կարգավիճակ և ունի դրանից բխող բոլոր իրավունքները` դիմելու, ստանալու պաշտոնական հերքումներ, գրավոր ներողություն, բարոյական վնասի գույքային փոխհատուցում: «Իհարկե այդ գործողությունները կախված են իմ պաշտպանյալի դիրքորոշումից, այս պահի դրությամբ դեռևս դիրքորոշումը չի հայտնել: Ինքն էլ է մտածում`անի՞, թե՞ չանի, ների՞, թե՞չների,-ասում է Ռուբեն Հակոբյանը:

Լուսանկարում` փաստաբան Ռուբեն Հակոբյանը