![](/static/articles/02/59/56/l-yyhVTAEChx.jpg)
Ի՞նչ է արժեցել Վրաստանի վարչապետի այցը Հայաստան
Վրաստանի վարչապետ Բիձինա Իվանիշվիլիի գլխավորած պատվիրակությունը հունվարին այցելել էր Հայաստան: Դեռ վաղ է խոսել, թե ինչ արդյունք կունենա այդ այցը Հայաստանի համար, սակայն այս պահին հայտնի է միայն, որ վրացի հյուրերի հունվարի 17-ի ժամանումն ու ամսի 18-ի մեկնումը ՀՀ պետբյուջեին արժեցել է մոտ 5.5 մլն դրամ:
Բիձինա Իվանիշվիլիի գլխավորած պատվիրակության՝ ՀՀ կատարած պաշտոնական այցի շրջանակներում ՀՀ ԱԳՆ «Պետական արարողակարգի ծառայություն» գործակալությունը «Այբ-Տուր» ՍՊԸ-ի հետ կնքել է պայմանագիր` վրացի հյուրերի մեկ գիշերվա կեցությունն ապահովելու համար (հունվարի 17-18):
Պատվիրակության կազմում եղել է 9 մարդ, եւ մեկ գիշերվա կեցության հյուրանոցային ծախսը կազմել է 2 միլիոն 282 հազար 220 դրամ:
Հունվարի 17-ին հյուրերի պատվին տրվել է նաեւ պաշտոնական ճաշ, որն արժեցել է 2 միլիոն 715 հազար դրամ: Այդ ծառայությունը մատուցել է «Սելենա» ՍՊԸ-ն:
Սա միակ ծախսը չէ, որ կատարվել է Վրաստանի վարչապետի գլխավորած պատվիրակության համար: Բիձինա Իվանիշվիլիի այցի շրջանակներում «Ֆան-Ֆան» ԱՐՏ ՍՊԸ-ից ձեռք է բերվել 400 դրամանոց 60 հատ մեխակ եւ 120 հազար դրամանոց մեկ ծաղկեպսակ, որը եղել է փայտե կարկասի վրա հավաքված կարմիր եւ սպիտակ մեխակներով` ձեւավորած դեկորատիվ տերեւներով: Ծաղիկների եւ ծաղկեպսակի գինը եղել է 144 հազար դրամ:
Ժամանող եւ մեկնող հյուրերին ՊՊ սրահում սպասարկելու համար «Արմենիա միջազգային օդանավակայաններ» ՓԲԸ-ի հետ կնքվել է 40 հազար դրամի պայմանագիր:
Վրաստանի վարչապետի գլխավորած պատվիրակության անդամներին նաեւ հուշանվերներ են տրվել` 9 հատ 0.5 լիտրանոց «Նաիրի» կոնյակ: Հուշանվերը ձեռք է բերվել «Արտէքսիմ» ՍՊԸ-ից եւ արժեցել է 246 հազար 600 դրամ:
Հյուրերի ժամանման առիթով «Նոյան Տապանից» ձեռք է բերվել նաեւ 2 հատ Վրաստանի պետական դրոշ` 2մ x 1մ մեծության, որն արժեցել է 36 հազար դրամ:
Ուշագրավն այն է, որ այս երկու ծառայությունների համար պայմանագրերը կնքվել են հունվարի 23-ին, այն դեպքում, երբ ծառայությունները մատուցվել են հունվարի 17-18-ին:
Լուսանկարը` civilnet.am-ի
Մեկնաբանություններ (5)
Մեկնաբանել