«Հետքի սրահում» Արտակարգ իրավիճակների նախարարի պաշտոնակատար Արմեն Երիցյանն է, ով ներկայացնում է «Օրինաց երկիր» կուսակցությունը Երեւանի ավագանու ընտրություններում:

Պրն Երիցյան, ինչո՞ւ որոշեցիք Ձեր թեկնածությունն առաջադրել:

Այս մասին շատ եմ խոսել, ինչպես գիտեք՝ Արտակարգ իրավիճակների նախարարությունում ես դեռ շատ անելիքներ ունեմ, բայց իմ գործընկերները, կուսակցությունը առաջարկեց, որ լինեմ առաջին համարը: Ինձ համար մի քիչ տարօրինակ էր, եւ ես բացատրեցի, որ դեռ անելիքներ ունեմ այստեղ, ծրագրեր կան, որ պետք է շարունակական լինեն, սակայն երկար զրուցելուց հետո ինձ բացատրեցին, որ, իրոք, դա պետք է եւ՛ կուսակցությանը, եւ՛ Երեւան քաղաքին եւ՛ անձամբ ինձ: Երկար մտածելուց հետո ես համաձայնեցի լինել ցուցակի 1-ին համարը:

Իսկ ինչի՞ց եք սկսելու Երեւանի փոփոխությունը:

Ընդհանուր առմամբ, ես իրավիճակին նայում եմ որպես ԱԻՆ ղեկավար: Անելիքները շատ են, բայց ես կարծում, որ սկիզբը պետք է լինի կարգուկանոն հաստատելը, որպեսզի յուրաքանչյուրը կարողանա իր առջեւ դրված խնդիրը կատարել: Մի խոսքով, մենք կսկսենք քաղաքապետարանից, մինչեւ ներքեւի օղակները: Ես բակային հանդիպումներ եմ ունենում, որտեղ խոսում եմ այն մասին, որ անելիքներ կան: Մենք չենք ասում, որ ներկայիս քաղաքապետը կամ թաղապետերը չեն աշխատում, մենք ասում ենք՝ կարող ենք ավելին անել: Հանդիպելով ազգաբնակչության հետ՝ տեսնում ես, որ կան խնդիրներ, որոնք հենց տեղում կարելի է արագ լուծել: Բոլոր ուղղություններով մենք ներկայացրել ենք մեր ծրագիրը, որտեղ կան դրույթներ բոլոր ոլորտների վերաբերյալ: Բայց կարծում եմ, որ պետք է հասնենք նրան, որ յուրաքանչյուր ծրագիր ի ծնե մահացած չլինի, կարողանանք կյանքի կոչել: Դա է կարեւոր այսօր:     

Երբ ասում եք, որ սկսելու եք կարգուկանոն հաստատելուց, հատկապես ի՞նչը նկատի ունեք: Հիմա կարգուկանոն չկա՞ քաղաքում:

Ոչ, կարգուկանոն կա: Ես նկատի ունեմ՝ սկսենք մեզանից: Այսինքն՝ ես եթե աշխատում եմ, իմ աշխատաոճը ո՞րն է: Ես առավոտյան 8.15-8.20 լինում եմ աշխատավայրում, նայում եմ կատարված աշխատանքների բոլոր ամփոփագրերը, նայում եմ՝ ինչ պետք է անենք, եւ երբ ժամը 9-ին իմ գործընկերները գալիս են աշխատանքի, ես իրենց առջեւ դնում եմ խնդիրներ՝ ով ինչ պետք է անի: Ես դա նկատի ունեմ: Որպես երեւանցի խոսելով կարգուկանոնի մասին՝ նկատի ունեմ, որ եթե յուրաքանչյուր երեւանցի հետեւի կարգուկանոնին, խախտում թույլ չտա, իր գործով զբաղվի, դա կլինի ամենաճիշտը:  

Բնապահպանները, ակտիվիստները շատ են խոսում Երեւանի քաղաքաշինական խնդիրների մասին՝ վերացվում են կանաչ տարածքները, քանդվում են հին Երեւանի շենքերը: Այս ուղղությամբ ի՞նչ քայլեր եք նախատեսում: Կարծես թե ՕԵԿ ծրագրում այս հարցին առանձնահատուկ ուշադրություն չի դարձված:

Ասեմ, որ այս ուղղությամբ անելիքներ շատ ունենք: Առաջին հերթին պետք է պահպանենք հին Երեւանի տեսքը, ինչ ունենք այսօր, ինչ մնացել է, պետք է դա կարողանանք պահպանել: Դա շատ կարեւոր եմ համարում: Եվ պետք է ունենանք մեր հետագա պլանը՝ ինչ ենք մենք ուզում: Եթե շենք-շինություններ ենք կառուցում, ապա դա անենք ոչ միայն քաղաքի կենտրոնում, այլ համաչափ զարգացում ունենանք բոլոր տարածքներում, բոլոր թաղերում: Շինարարությունը պետք է լինի պլանավորված, իմանանք՝ որտեղ ինչ ենք կառուցում: Այսօր տեսնում եք՝ տանիքներում հարկեր են ավելացնում, ով ինչ ճարտարապետական ոճով ասես՝ անում է: Մենք պետք է քաղաքի տեսքը չգցենք:

Ինչ վերաբերում է կանաչապատ գոտիներին, այս ուղղությամբ պետք է աշխատանքներն ավելացվեն, կանաչ գոտիներում շինարարություն չլինի: Եթե սրճարան է կառուցվում, ապա այնպիսի տեղերում, որ ծառ չկտրենք՝ ասելով, թե հետո էդտեղ ծառ կտնկենք: Ավելի լավ է այնպիսի ուղղությամբ տանենք, որ կանաչապատ գոտիները զարգացնենք:

Կոնկրետացնենք մեր զրույցը մի հարցի շուրջ: Բոլորը քննարկում են Փակ շուկայի պատմությունը: Ձեր դիրքորոշումը ո՞րն է:              

Ասեմ հետեւյալը. ես ծրագրին ծանոթ չեմ, թե այնտեղ ինչ է կառուցվելու, ինչ պետք է արվի: Բայց կարծում եմ, որ հին տեսքը պետք է մնա: Դա պատմական հուշարձան է եւ քանդել չի կարելի:

Երեւանի բյուջեն ինչպե՞ս եք տնօրինելու: Երեւանի բյուջեն մեծ է, եւ քննարկվում է այն ոչ արդյունավետ ծախսելու հարցը: Մասնավորապես՝ մրցույթները լավ չեն անցկացվում, կան յուրացումներ: Ուսումնասիրե՞լ եք Երեւանի բյուջեի ծախսումները, տեղյա՞կ եք:   

Ես կանեի հետեւյալը, եւ իմ հանդիպումների ժամանակ դա ասում եմ: Որպես քաղաքապետ՝ նախ եռամսյակը մեկ ելույթ կունենայի, իմ կատարած եւ կատարելիք աշխատանքների մասին կզեկուցեի: Երկրորդ՝ կտեղեկացնեի, թե բյուջեում, արտաբյուջեում որքան գումար կա, որ գումարը ուր ենք փորձում ուղղել: Այսինքն՝ խորհրդակցելով ավագանիների հետ՝ մենք պետք է պայմանավորվենք: Ասենք՝ այսօր ունենք 1 մլրդ կամ 10 մլրդ դրամ: Դրանից որ շրջանին որքան գումար ենք հատկացնում: Եվ այդ շրջանի երեւանցու ձայնը լսելով՝ իմանանք, թե ինչն է իրենց համար առաջնահերթ: Խորհրդակցելով ՀԿ-ների, այդ թաղերի հարգված մարդկանց հետ, ովքեր կարողանում են ներկայացնել իրենց թաղի հոգսերը՝ մենք կորոշենք որ գումարը որտեղ ծախսել: Եվ այս դեպքում արդեն բամբասանքներ չեն լինի, ճիշտ ինֆորմացիա կունենան մարդիկ եւ չեն կասկածի՝ որ գումարն ինչպես է ծախսվում: Եթե ուղղում ենք ինչ-որ տեղ, ասում ենք՝ գիտեք, մենք ունենք 1 մլրդ կամ 10 մլրդ, սա ենք որոշել, սա էլ պետք է անենք: Որ էրեբունցին, շենգավիթցին, կենտրոնի բնակիչները տեսնեն, որ հավասար մոտեցում է ցուցաբերվում քաղաքային իշխանության կողմից:

Այսինքն՝ հաշվետվության մեխանիզմը պետք է ներդնեք, հաշվետու լինեք ավագանուն, երեւանցիներին:

Միանշանակ: Ես ուզում եմ հաշվետու լինել երեւանցիներին: Բակային հանդիպումների ժամանակ բոլորն ինձ այդ հարցն ուղղում են: Ասում են՝ գումար են մեզանից հավաքում, այդ գումարն ու՞ր է գնում: Կամ ասում են՝ հիմա գալիս եք, որովհետեւ մենք ձեզ պետք ենք, մեկ էլ կգաք 4-5 տարի հետո: Դա ինձ համար վիրավորական է, որովհետեւ տեսնում ես, որ մարդիկ չեն վստահում ու շատ ժամանակ ճիշտ են անում, որ չեն վստահում: Թեկնածուները գալիս են ու հետո էլ չեն երեւում, որովհետե պետք չեն: Ես պարտավորվում եմ եռամսյակը մեկ անգամ զեկուցել երեւանցուն կատարված աշխատանքների մասին, թե ինչքան գումար ենք հավաքել, որ կողմ ենք ուղղում: Թաղապետերն էլ իրենց հերթին ամիսը մեկ անգամ կզեկուցեն քաղաքապետին՝ այսքան գումար ենք հավաքել, այս աշխատանքներն ենք արել եւ ունենք այս-այս խնդիրները: Միասին նստենք, որոշենք:

Մարդիկ դժգոհ են համատիրության աշխատանքից: Ես գտնում եմ, որ պետք է այնպես անենք, որ նրանք էլ աշխատեն, եւ ազգաբնակչությունը նրանց հավատա, տեսնի, որ նրանք միայն փող չեն հավաքում, այլ հոգում են իրենց խնդիրների մասին: Ավագանիներն էլ պետք է հասկանան իրենց ֆունկցիոնալ պարտականությունները: Որ պետք է երեւանցու մատից փուշ հանեն:

Պրն Երիցյան, ու՞մ եք համարում Ձեր հիմնական մրցակիցը:

Ճիշտն ասած՝ բոլորին էլ համարում եմ հիմնական մրցակից եւ կարծում եմ, որ յուրաքանչյուրը, ով ներկայացնում է իր ծրագիրը, պետք է կարողանա երեւանցուն համոզել, որ կյանքի է կոչելու այդ ծրագիրը: Ես չեմ ուզում որեւէ մեկին առանձնացնել, բայց տարբեր կուսակցությունների ներկայացուցիչներ սկսել են իմ մասին ասել, թե ես ընդդիմադիր կեցվածք եմ ընդունել: Ես ինչ ասում եմ, ի սրտե եմ ասում: Շատերին դուր չի գալիս, բայց ես գտնում եմ, որ պետք է հարգենք մեկս մյուսին, ով ընտրվեց, մյուսները պետք է կանգնեն կողքին, որ օգնեն:

Իսկ ընտրախախտումների դեմ ինչպե՞ս եք պատրաստվում պայքարել:

Ես կարծում եմ, որ այդ մեխանիզմները կան: ՕԵԿ-ը բոլոր ընտրատարածքներում ունի իր ներկայացուցիչները, որոնք թույլ չեն տա, որ որեւէ մեկը խախտում թույլ տա:

Արդյոք դժվար չի լինի՞, որովհետեւ ՀՀԿ-ն Ձեր կոալիցիոն գործընկերն է, նրանց դեմ հնարավո՞ր է պայքարել:

Բայց ինչու՞ նրանց դեմ: Կարծում եմ՝ նրանք էլ ազնիվ ընտրության են գնալու: Ինչու՞ ոչ մյուսների դեմ եւ անպայման ՀՀԿ-ի դեմ:

Մյուսների հետ կոալիցիա չեք կազմել, դրա համար եմ ասում:

Ես գտնում եմ, որ էստեղ յուրաքանչյուրն ունի իր շահը եւ պետք է պաշտպանի իր շահերը:

ԱԻՆ-ում աշխատելիս Դուք նույն հաշվետվողականության սկզբունքո՞վ եք աշխատել:  Երբեւէ հանրապետության քաղաքացիներին հաշվետվություն տվե՞լ եք:

Քանի որ Ձեր աշխատանքների մասին խոսեցինք, կուզենայի անդրադառնայիք Նուբարաշենի թափոնների գերեզմանոցին: Ինչպե՞ս ավարտվեց այդ պատմությունը: Ի՞նչ վիճակում է հիմա գերեզմանոցը:

Ես հիշում եմ՝ մենք միասին գնացինք էնտեղ: Վիճակը հետեւյալն է. այնտեղ 32 տեսակի թունաքիմիկատ կա՝ 520 տոննա ընդհանուր չափով: Մենք աշխատանքներ ենք տանում միջազգային կազմակերպությունների հետ, այս պահին դեռ վտանգավոր բան այնտեղ չեմ տեսնում, բայց գերեզմանոցը գտնվում է սողանքային գոտում, եւ դա շատ մեծ վտանգ է: Մեր լեհ գործընկերների հետ ենք աշխատում, որպեսզի այնտեղից ամբողջը հանենք, տեսնենք՝ որը պետք է այրվի, որը՝ պահպանվի: Լուրջ աշխատանք է տարվում, եւ ոչ միայն այդտեղ, այլեւ ամբողջ հանրապետության տարածքում եղած թունաքիմիկատների գերեզմանոցների ուղղությամբ: Եւ դա միայն միջազգային կազմակերպությունների հետ կարող ենք անել:

Պրն Երիցյան, եթե Դուք դառնաք քաղաքապետ, ներկա քաղաքական ուժերից ու՞մ հետ եք պատրաստ համագործակցել:

Բոլորի հետ պատրաստ եմ համագործակցել, ովքեր սիրում են իմ Երեւանը, ովքեր պատրաստ են կանգնել իմ կողքին: Ընտրվելուց հետո ես պատրաստ եմ ուսումնասիրել բոլորի ծրագրերը խորությամբ, եւ եթե պետք է՝ անձամբ կգնամ իրենց կուսակցություն, կառաջարկեմ, որ ինձ հետ աշխատեն: Նրանք, ովքեր սիրում են Երեւանը, կարծում եմ՝ կկանգնեն իմ կողքին:

Վերջին հարցը. ինչու՞ պետք է երեւանցին իր ձայնը տա ՕԵԿ-ին:

Ես կարծում եմ, որ երեւանցին առաջին հերթին իր ձայնը պետք է տա Արմեն Երիցյանին, որովհետեւ ես իրենցից մեկն եմ, ես երեւանցի եմ, ես սիրում եմ Երեւանը: Եւ ՕԵԿ-ին պետք է ձայնը տա, որովհետեւ այս տարիների ընթացքում ապացուցել ենք, որ մեր կուսակցությունն իր խոսքի տերն է, եթե մի բան ասում ենք, ուրեմն պետք է անենք: Ես կարծում եմ, որ երեւանցիները պետք է կանգնեն Արմեն Երիցյանի կողքին:                  

Սույն հաղորդումը հնարավոր է դարձել իրականացնել Քաունթերփարթ ինթերնեշնլի հայաստանյան ներկայացուցչության կողմից իրականացվող Քաղաքացիական հասարակության և տեղական ինքնակառավարման աջակցության ծրագրի և Ամերիկայի Միացյալ Նահանգների բնակչության առատաձեռն աջակցության շնորհիվ` ԱՄՆ Միջազգային զարգացման գործակալության գործընկերային պայմանագրի շրջանակներում՝ «Հետաքննող լրագրողներ» կազմակերպության միջոցով: Սույնի բովանդակությունը, արտահայտված տեսակետները և կարծիքները պատկանում են հեղինակին` «Հետաքննող լրագրողներ» կազմակերպությանը, և հնարավոր է, որ չհամընկնեն Քաունթերփարթ ինթերնեշնլի հայաստանյան ներկայացուցչության, ԱՄՆ Միջազգային զարգացման գործակալության և ԱՄՆ կառավարության տեսակետների հետ: