![](/static/articles/02/59/80/l-ZOxISbvlrh.jpg)
Զարուհի Փոստանջյանը ԱԺ նախագահին հորդորեց ցույցեր անել, եթե չի կարողանում այլ ձևով պայքարել
Այսօր մեկնարկեց Ազգային ժողովի հերթական քառօրյան: Նիստը սկսվելուց րոպեներ անց «Ժառանգություն» խմբակցության պատգամավոր Զարուհի Փոստանջյանը նախ ողջունեց՝ ասելով՝ «Բարև, Երևան», ապա հերթական անգամ հետաքրքրվեց ԱԺ նախագահ Հովիկ Աբրահամյանից, թե երբ են ԱԺ օրակարգից հանվելու Հայաստան-Թուրքիա «խայտառակ արձանագրությունները»:
«Դա ԱԺ նախագահի լիազորություններից դուրս է»,- պատասխանեց Հովիկ Աբրահամյանը:
Զարուհի Փոստանջյանը նշեց, որ գուցե ԱԺ նախագահի լիազորություններից դուրս է, սակայն լինելով քաղաքական գործիչ և զբաղեցնելով ԱԺ նախագահի պաշտոնը՝ Հովիկ Աբրահամյանն ունի լծակներ:
«Կարող եք կազմակերպել ցույցեր, բողոքի ակցիաներ, եթե այլ ձևով չեք կարողանում պայքարել»,- Հովիկ Աբրահամյանին խորհուրդ տվեց Զ. Փոստանջյանը:
«Տիկին Փոստանջյան, ընդունակ չե՞ք մի լավ բան խորհուրդ տալ, որ հորդորում եք ցույցեր անել»,- հակադարձեց ԱԺ նախագահը:
Հովիկ Աբրահամյանը առարկեց նրան, որ այդ արձանագրությունը խայտառակ է, և ասաց, որ եթե վավերացվեր Թուրքիայի կողմից, ապա Հայաստանը տնտեսական առումով շահեկան դիրքերում կհայտնվեր:
Արտաշես Գեղամյանն էլ նշեց, որ այդ արձանագրությունները բարձրացրել են Հայաստանի դիրքերը միջազգային ասպարեզում:
Մեկնաբանել