ՀՀ փոխվարչապետ, տարածքային կառավարման նախարարի պաշտոնակատար  Արմեն Գեւորգյանն այսօր ընդունել է Եվրոպայի խորհրդի տեղական եւ տարածքային իշխանությունների կոնգրեսի դիտորդական առաքելության պատվիրակությանը` Սթյուարտ Դիքսոնի գլխավորությամբ:  Պատվիրակությունը ժամանել է` հետեւելու մայիսի 5-ին կայանալիք Երեւանի ավագանու ընտրությունների ընթացքին:

Ա. Գեւորգյանը նախ շնորհակալություն է հայտնել Կոնգրեսի կողմից Հայաստանի կառավարության հրավերի ընդունման եւ դիտորդական առաքելության իրականացման համար:  Նա հյուրերին տեղեկություններ  է ներկայացրել ընտրական գործընթացի մասին` նշելով, որ Երեւանի ավագանու ընտրությունները եւս, ինչպես վերջին մեկ տարվա ընթացքում հանրապետությունում տեղի ունեցած ընտրությունները, անցկացվում են նոր Ընտրական օրենսգրքի համաձայն, որն անհրաժեշտ պայմաններ է ապահովում ազատ եւ արդար ընտրությունների իրականացման համար:

Ա. Գեւորգյանը նշել է, որ Երեւանի ավագանու ընտրություններն անցկացվում են  բավականին ուժեղ մրցակցային պայմաններում: Առաջադրվել է  յոթ քաղաքական ուժ, որոնք  ակտիվ քարոզարշավ են իրականացնում, այդ թվում` հեռարձակվող լրատվամիջոցներով: Բոլոր ուժերը հավասարապես ունեցել են սահմանված  հնարավորությունները` ինչպես առաջադրվելու, գրանցվելու, այնպես էլ քարոզչություն իրականացնելու առումով:

Ընտրական հանձնաժողովներում եւս ոչ իշխանական քաղաքական ուժերը բավականին մեծ ներկայացվածություն ունեն, ինչը թույլ կտա լուրջ  վերահսկողություն իրականացնել ինչպես հանձնաժողովների աշխատանքի, այնպես էլ ընտրական գործընթացի նկատմամբ:

Երեւանի ավագանու ընտրություններն անցկացվում են արդեն երկրորդ անգամ եւ, ըստ Ա. Գեւորգյանի, Երեւանի ՏԻ մարմինների ձեւավորման մոդելը կայանում է ու  հետագայում հնարավոր է կիրառվի հանրապետության մյուս խոշոր քաղաքների դեպքում եւս:

Ա. Գեւորգյանը պատասխանեց նաեւ պատավիրակության անդամներին հետաքրքրող հարցերին: Այս մասին հայտնում է ՏԿՆ հասարակայնության հետ կապերի բաժինը: 

ԿԸՀ մամուլի ծառայությունն էլ հայտնում է, որ այսօր ՀՀ կենտրոնական ընտրական հանձնաժողովի նախագահ Տիգրան Մուկուչյանն ընդունել է Երևանի ավագանու 2013թ. մայիսի 5-ի ընտրություններին դիտորդական առաքելություն իրականացնող Եվրոպայի խորհրդի տեղական և տարածքային իշխանությունների կոնգրեսի ներկայացուցիչներին:

Ողջունելով հյուրերին` Տիգրան Մուկուչյանը բարձր է գնահատել դիտորդական առաքելությունների դերն ու նշանակաությունն ընտրական գործընթացներում:

Դիտորդական առաքելության պատվիրակության ղեկավար Ստյուարտ Դիքսոնի խնդրանքով ԿԸՀ նախագահը ներկայացրել է տեղեկատվություն` Երևանի ավագանու ընտրություններին մասնակցող կուսակցությունների և կուսակցությունների դաշինքի, ինչպես նաև հանձնաժողովի կողմից իրականացվող ընտրությունների նախապատրաստական աշխատանքների վերաբերյալ:

Քննարկվել են նաև ընտրական հանձնաժողովների կազմավորման, ընտրողների ցուցակների վարման և կազմման սկզբունքներին առնչվող հարցեր: