![](/static/articles/02/62/24/l-9F7Tr19bUl.jpg)
Կանայք ընտրողներին բերում են տեղամասեր եւ ուղղորդում նրանց
Շենգավիթի թիվ 52 դպրոցում տեղակայված է 3 ընտրատեղամաս՝ թիվ 12/15, 15/16 եւ 15/17:
Թիվ 12/15 ընտրատեղամասում ընտրողներից մեկն այնքան է հուզվել, որ քվեարկած քվեաթերթիկը թողել է քվեախցում եւ հեռացել: Նրան մի կերպ հետ են բերել, որպեսզի քվեաթերթիկը դնի ծրարի մեջ եւ գցի քվեատուփը:
82-ամյա ընտրողներից մեկն էլ փորձել է պրովոկացիա անել՝ բղավելով, թե ՀՀԿ-ին է ընտրում: Դպրոցի բակում հավաքված են մի քանի երիտասարդներ, ովքեր ուղղորդում են ընտրողներին:
«Կին կա, որը ոնց որ տուրիստական գործակալության գիդ լինի: Ապացույցները կան, լուսանկարել եմ: Նա կարմիր վերնաշապիկ էր հագել, ցուցակը ձեռքին ընտրողներին հավաքել էր իր շուրջը եւ ուղղորդում էր»,-«Հետքին» տեղեկացրեց «Civilnet»-ի դիտորդ Աննա Դավթյանը:
Դիտորդը կատարվածի մասին տեղեկացրել է հանձնաժողովի ԲՀԿ-ական նախագահ Արթուր Մովսիսյանին: Վերջինս «Հետքին» տեղեկացրեց, որ դիտորդի տեղեկացնելուց հետո ինքը ոստիկանների հետ դուրս է եկել բակ, սակայն այնտեղ մարդ չի եղել:
«Ես նկարն եմ տեսել ու անմիջապես դուրս եմ եկել: Եթե նման բաներ տեսնում եք, շուտ ասեք»,-դիմելով դիտորդին՝ ասաց հանձնաժողովի նախագահը:
Մեր այցելության ժամանակ, թեեւ «կարմիր վերնաշապիկով» կնոջը չտեսանք, սակայն նրան փոխարինելու էին եկել 2-3 այլ քաղաքացի, որոնցից մեկը դարձյալ կին էր: Վերջինս անընդհատ տեղաշարժվում էր եւ խուսափում մեր թղթակցի հետ հանդիպումից:
Մեկնաբանել