Սերժ Սարգսյանը երեկ հայտարարել է, թե ՀՀ հատուկ քննչական ծառայության պետ Անդրանիկ Միրզոյանը պաշտոնանկ է արվել, որովհետև չի կարողացել լուծել իր առջև դրված խնդիրը: «Այդ ծառայությունը չի կարող լինել կամակատար»,- ասել է Սերժ Սարգսյանը:

«ՉԻ» - Մեր ջերմ ողջույնները գլխավոր դատախազ Աղվան Հովսեփյանին: Որքան հասկանում ենք, եթե Սերժ Սարգսյանը դժգոհ է, որ Անդրանիկ Միրզոյանը կամակատար է եղել, նշանակում է՝ ոչ թե իր կամակատարն է եղել, այլ մեկ ուրիշի: Իսկ այդ «մեկ ուրիշը» կարող էր միայն Աղվան Հովսեփյանը լինել:

Մյուս կողմից էլ հասկանալի է, որ Աղվան Հովսեփյանն ապօրինաբար է իր կամքը թելադրել ՀՔԾ պետին, որովհետև օրենքով ՀՔԾ-ն անկախ և ինքնուրույն մարմին է: Մի խոսքով, Աղվան Հովսեփյանի գործերն ակնհայտորեն լավ չեն, և մեծ է հավանականությունը, որ մի քանի ամիս անց նա կզբաղվի բացառապես եկեղեցաշինությամբ և շուրջպարով:

Իսկ ՀՔԾ նոր պետը, հուսանք, դասեր կքաղի իր նախորդի անփառունակ ճակատագրից և կլինի բացառապես Սերժ Սարգսյանի կամակատարը: Այդպես ավելի ապահով կլինի և համակարգի վերահսկելիության, և ֆինանսական հոսքերի թափանցիկության ապահովման տեսանկյունից: