ՀՀԿ ցուցակով Երևանի ավագանի ընտրված, շախմատի օլիմպիական խաղերի չեմպիոն, Հայաստանի շախմատի ֆեդերացիայի փոխնախագահ Սմբատ Լպուտյանը մտադիր է վերցնել ավագանու իր մանդատը: Այս մասին երեկ «ՀԺ» թղթակցին հայտնել է ինքը՝ Լպուտյանը:

«Քանի որ դա հասարակական աշխատանք է, և իմ գործունեության հետ իրավունք ունեմ համատեղելու, կարծում եմ՝ կվերցնեմ մանդատը»,- ասել է նա: Ձեր վերջնական որոշումը ինչ-որ հանգամանքի՞ց է կախված: «ՀԺ» թղթակցի այդ հարցին նա պատասխանել է. «Ես լրիվ ազատ մարդ եմ: Իմ որոշումն է», ապա հավելել, որ մանդատը հաստատ վերցնելու է:

«Ա1+» հեռուստաընկերության սեփականատեր, «Մելտեքս» ՍՊԸ-ի տնօրեն Մեսրոպ Մովսեսյանը, ով «Բարև Երևան» դաշինքի ցուցակի 2-րդ համարն է, մանդատը վերցնելու հստակ որոշում դեռ չի կայացրել: «Երբ գործը դրան հասնի, ամեն ինչ հստակ կլինի: Սա էն իրավիճակն է, որտեղ մտածելու շատ բան կա»,- երեկ «ՀԺ» թղթակցի հետ զրույցում ասել է նա:

Դուք սպասում եք բողոքարկման արդյունքների՞ն. «ՀԺ» թղթակիցը հարցրել է «Ա1+»-ի ղեկավարին: «Բոլոր տիպի զարգացումներին եմ սպասում: Ես համոզված եմ, որ զարգացումներ լինելու են, և արդարացի զարգացումներ են լինելու, ոչ թե հնարովի ու շինծու: Եվ էդ զարգացումներից էլ կախված կլինեն իմ քայլերը»,- պատասխանել է Մեսրոպ Մովսեսյանը: