Ախթալայի Սարահարթ թաղամասում գտնվող թիվ 1` Ծովինար Բլուդյանի անվան մանկապարտեզի շենքը կառուցվել է 1967 թ.-ին, և անցած տարիներին այն կապիտալ վերանորոգման երբևէ չէր ենթարկվել: 

Մանկապարտեզի 320 քմ տարածքը վերանորոգվել է Ախթալայի քաղաքապետարանի և մոսկվաբնակ ախթալեցի Նորայր Բլուդյանի 20 մլն դրամ ներդրումներով:

Հուլիսի 2-ին Ախթալայի և նրա տարածաշրջանի  հոգևոր հովիվ Տեր Վիգեն քահանա Ղազարյանը օրհնեց  մանկապարտեզի հիմնանորոգված մասնաշենքը, որը  համընկել էր մանկապարտեզի` «Մնաս բարով մանկապարտեզ» հանդեսի արարողության հետ:  

Արարողությանը մասնակցում էր նաև բարերարը` Նորայր Բլուդյանը: Արարողությունը սկսվեց մասնակիցների տերունական աղոթքով:

Մանկապարտեզ հաճախում է 30 երեխա:  «Մինչեւ նորոգումը մանկապարտեզի  պայմանները եղել են ահավոր և ուղղակի ճիշտ չէր այդ պայմաններում շահագործել մանկապարտեզը: Հիմնանորոգվել են  մանկապարտեզի  տանիքը, երկու խմբասենյակներն ու ննջարանները, կարգավորվել են զուգարաններն ու սանհանգույցները»,- ասաց մանկապարտեզի տնօրեն Ալիսա Առաքելյանը:

Ախթալայի քաղաքապետ Հայկազ Խաչիկյանը լրագրողներին տեղեկացրեց, որ Ախթալայում կան  մանկապարտեզի գործող և մեկ չգործող շենքեր:

Ախթալան  ունի ռելեֆային կտրտվածություն, այդ պատճառով էլ քաղաքի 3` Սարահարթ, Բարիտ և Սվինեց թաղամասերն ունեն այդ 3 մանկապարտեզների պահանջարկը: 

«Բարիտ» թաղամասի մանկապարտեզի շենքն ունի բավարար պայմաններ:  Երրորդ` Սվինեց թաղամասի  մանկապարտեզի շենքը 16 տարի չի գործում: Հայկազ Խաչիկյանը որոշել է 2012թ.-ին հիմնանորոգել մանկապարտեզի շենքը: Այս գործում նա կրկին ակնկալում էր ախթալեցի բարերարի աջակցությունը. «2012թ.-ին վերանորոգման նախատեսված մանկապարտեզը գտնվում է այն թաղամասում, որտեղ ապրել է պարոն Բլուդյանը, հուսով եմ` նա իր ներդրումային մասնակցությունը կունենա նաև այդ մանկապարտեզի հիմնանորոգման աշխատանքներին»,- ասաց քաղաքապետը:  

Հայկազ Խաչիկյանն ասաց նաեւ, որ 2011թ.-ի աշնանը կսկվի թիվ1 մանկապարտեզի մյուս մասնաշենքի  հիմնանորոգման և Ախթալայի «Բարիտ» թաղամասում խաղահրապարակ կառուցելու աշխատանքները: 

Նորայր Բլուդյանը արարողակարգային սպասք էր նվիրել նաև Ախթալայի Ս. Մարիամ Աստվածածին եկեղեցուն:

Օրվա 2-րդ կեսին Ս. Մարիամ Աստվածածին եկեղեցում Տեր Վիգեն քահանա Ղազարյանի կողմից օրհնվեց նաև եկեղեցուն նվիրած սպասքը:

Նորայր Բլուդյանը  կարծում է, որ ամեն մարդ իր հնարավորության սահմաններում  պետք է օգնի իր հայրենիքին և իր բնակավայրին: 

«Ախթալայի քաղաքապետարանի հետ  որոշել ենք  ստեղծել հայրենակցական հասարակական մի կազմակերպություն, որի միջոցով կհամախմբենք բարերաների  ֆինանսական միջոցները` Ախթալայի զարգացման համար»,- ասաց նա: