«Անտարես» հրատարակչությունը հանրապետության 10 մարզերի կրթության վարչությունների հետ համատեղ ուսուցիչների համար անցկացնում է սեմինարների շարք դպրոցական տարբեր առարկաներից: Սզբնական փուլում ընտրվել է երեք առարկա՝ մաթեմատիկա, ֆիզիկա եւ քիմիա:

«Ֆիզիկա եւ քիմիա առարկաներից ներկայացնում ենք կրթական նոր, փոփոխված ծրագրին համապատասխանող դասագրքերը, այնտեղ օգտագործված նորարարություններն ու էլեկտրոնային օժանդակ նյութերը: Մաթեմատիկայից ներկայացնում ենք Գեոգրաբիա կոչվող նոր ձեռնարկը, որը հնարավորություն է տալիս ստեղծելու երկրաչափական եւ մաթեմատիկական մոդելներ կամ առկա մոդելներից օգտվելու տարբեր եղանակներ, որն էապես հեշտացնում է նյութի ընկալումը: Արվել է ամեն ինչ, որ յուրաքանչյուր աշակերտ, անգամ միջին կամ թույլ կարողությունների, ըմբռնի նյութը: Թույլ աշակերտը, ներգրավվելով ուսումնական պրոցեսում, խանգարողից վերածվում է աջակցողի, իսկ ուժեղ աշակերտների համար լրացուցիչ ժամանակ է մնում»,- նոր դասագրքերի եւ մեթոդաբանության արդյունավետությունն է ներկայացնում «Անտարես» հրատարակչության տնօրեն Արմեն Մարտիրոսյանը:

Դասավանդման նոր մեթոդի շնորհիվ բարձրանում է տվյալ դասապրոցեսի արդյունավետությունը: Սեմինարի մասնակից, Գյումրիի «Բալատոն» վարժարանի ֆիզիկայի բազմափորձ ուսուցչուհի Լալա Հայրապետյանի կարծիքով՝ նոր մեթոդաբանությունն ու ֆիզիկայի դասագրքի առավել պարզեցված տարբերակը մի քանի անգամ հեշտացնելու է իրենց գործը:

Լալա Հայրապետյանը	Արմեն Մարտիրոսյանը

«Հայտնի է, որ ֆիզիկա առարկան քչերն են սիրում եւ այն սիրելի դարձնել աշակերտներից յուրաքանչյուրին բարդ խնդիր է: Նոր դասագրքրերը, որ առավել պարզեցված են, հնարավորություն են տալիս 6-րդ դասարանի ֆիզիկան ավելի շատ խաղի ձեւով մատուցել: Արված է ամեն ինչ, որ առարկան իր բարդությամբ, ընկալելու դժվարությամբ հենց սկզբից աշակերտի համար մերժելի չլինի, սեր առաջանա աշակերտի մոտ ֆիզիկայի հանդեպ,- ասում է տիկին Հայրապետյանը,- նախորդ դասագրքրերի թերությունների քննարկման հիման վրա ստեղծել են ավելի նոր, ավելի որակով դասագրքրեր, որոնք համապատասխանում են ժամանակակից պահանջներին»:

Շիրակի մարզի 180 դպրոցի 500-ից ավելի ուսուցիչներ էին մասնակցում Գյումրիում անցկացվող սեմինարին: Դպրոցների տնօրենները սեմինարի ավարտին ծրագրի կազմակերպիչների կողմից ստացան 12 դասագիրք (ֆիզիկա, քիմիա, մաթեմատիկա ), ուսումնական ձեռնարկներ եւ մեկ գեղարվեստական գիրք:

«Կան գյուղերում փայլուն գիտելիքների տեր ուսուցիչներ՝ շատ պատրաստված, բայց սեմինարներն ապացուցում են, որ այս նոր նյութերը, նորարարություներն իրենց համար սպասված էին: Ուսուցիչը, հասկանալով եւ ընկալելով, թե, ասենք, Ռուսաստանում, Ֆրանսիայում կամ Լեհաստանում ինչպես են դասավանդում, կարող է դրանք տեղայնացնել, եւ նյութն ավելի մատչելի տալ աշակերտին: Մեր կյանքը հիմա այնպիսին է, որ ամեն ինչ բավական արագ է փոփոխվում ու շատ կարեւոր է այդ փոփոխություններին համընթաց քայլելը»,- ասում է Արմեն Մարտիրոսյանը: