![](/static/articles/02/64/49/l-4GTuuHVLdI.jpg)
Նոր Հայկազեան Բառարանը եւ Առձեռն Հայկազեան Բառարանը հասանելի եւ որոնելի՝ Համացանցին վրայ
Այսօր «Նայիրի» կայքին վրայ լոյս տեսան «Նոր Բառգիրք Հայկազեան Լեզուի» եւ «Առձեռն Բառարան Հայկազնեան Լեզուի» աշխատութիւններու թուայնացուած տարբերակները։ Բառարանները անհրաժեշտութիւն են հայագիտութեամբ զբաղող ոեւէ անձի համար, եւ այժմ ձրիաբար հասանելի են հանրութեան եւ որոնելի ըստ գլխաբառերու։
«Նոր Բառգիրք Հայկազեան Լեզուի» կոթողական երկհատոր գործը, որ ծանօթ է նաեւ «Երից Վարդապետաց Բառարան» անունին տակ, հրատարակուած է 1836 եւ 1837 տարիներուն, Վենետիկի մէջ, եւ 1979 թուականին վերահրատարակուած՝ Երեանի Պետական Համալսարանի կողմէ։ Բառարանին հեղինակներն են Մխիթարեան Միաբանութեան անդամներ՝ Գաբրիէլ Աւետիքեան, Խաչատուր Սիւրմէլեան, եւ Մկրտիչ Աւգերեան։
Մեկնելով «Նոր Բառգիրք»ի մեծ գործին փորձառութենէն, Հայր Մկրտիչ Աւգերեանը 1846-ին հրատարակեց «Առձեռն Բառարան Հայկազնեան Լեզուի»ն, մանրատառ բնագրով, սեղմ հատորով եւ սակայն ամենաճոխ բովանդակութեամբ։ Նոյն գործը վերահրատարակուեցաւ 1865-ին, Վենետիկի մէջ, Հայր Գրիգոր Ճէլալեանի կողմէ, նոյն խորագրին տակ եւ սակայն առաւել եւս ճոխացմամբ, 5000 բառերու յաւելումով։
Ծրագիրը իրականացած է «Համազգային» Հայ Կրթական եւ Մշակութային Միութեան նիւթական աջակցութեամբ։
«Նայիրի» կայքը 2005 թուականէն ի վեր հայերէն լեզուի ելեկտրոնային գործիքներ կը տրամադրէ, ներառեալ՝ հայերէնի բացատրական եւ երկլեզու բառարաններ, թէ՛ արեմտահայերէնով, թէ՛ արեելահայերէնով։ 2010 թուականին «Նայիրի» կայքի եւ HySpellի համագործակցութեան շնորհիւ տրամադրելի դարձաւ դասական հայերէնի ամենէն լիակատար ուղղագրական սրբագրիչը, որուն բառացանկը կ՚ընդգրկէ աւելի քան 156,000 գլխաբառ եւ 5 միլիոնէ աւելի հոլովներ։ «Նայիրի» կայքը անվճար սպասարկութիւն մըն է որ կը գործէ բարերարներու, կրթական հիմնարկներու եւ հայերէնի երկարակեցութեամբ մտահոգ անձերու նիւթական աջակցութեան շնորհիւ։
Թուայնացուած բառարանները հասանելի են հետեւեալ հասցէներով.
http://www.nayiri.com/
http://www.nayiri.com/
Այժմ կայքին մէջ զետեղուած են հետեւեալ ցանկին մէջի 15 բառարանները.
http://www.nayiri.com/
Մեկնաբանություններ (1)
Մեկնաբանել