HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Հակոբ Սանասարյան. «Եթե «Մեթըլ Փրինս»-ը այսպես շարունակի, 4-6 տարի հետո այս տարածքը կարող է վերածվել մահվան դաշտի» (վիդեո)

Մայիսի 15-ին բնապահպանների մի խումբ «Հայաստանի Կանաչների միություն» ՀԿ-ի նախագահ Հակոբ Սանասարյանի ղեկավարությամբ այցելել էին Ախթալա`  տեղում դիտարկելու «Մեթըլ Փրինս Էլ-Թի-Դի» ընկերությանը պատկանող Շամլուղի բաց հանքավայրի, ընկերության պոչամբարների  բնապահպանական իրավիճակը, ԼՀԿ-ի ջարդման արտադրամասի  արտադրական պրոցեսները և բանվորների աշխատանքային պայմանները:  

Օրվա կեսին, երբ բնապահպանները Շամլուղի գերեզմանների մոտից՝ հանքավայրից դուրս, բարձրադիր տարածքից նայում էին բաց հանքը, տարածքը վերահսկող ԼՀԿ-ի անվտանգության աշխատողի ահազանգով անվտանգության մի խումբ աշխատողների  ուղեկցությամբ բնապահպանների մոտ հայտնվեց ԼՀԿ-ի հանքերի պետ Արմեն Նաղդալյանը: Վերջինս բնապահպաններից պահանջեց շտապ լքել  տարածքը: «Դուք ո՞վ եք»,- Հակոբ Սանասարյանին դիմեց  հանքերի պետը: Բնապահպանները իրենց հերթին փորձեցին պարզել Արմեն Նաղդալյանի ինքնությունը: «Ցույց տվեք այն  փաստաթուղթը, որ Դուք իրավունք ունեք մեզ վռնդելու»,- ասաց բնապահպաններից  տիկին Գրետան:

Բնապահպանները հանքերի պետից պահանջեցին նաև փաստաթուղթ`  տարածքը ԼՀԿ-ին պատկանելու մասին: «Դուք պետք է գայիք մի հատ հիմնարկ, Ձեզ ուղեկցող կտային, նորմալ ձևով Ձեր ուզած տեղերը կայցելեիք, Ձեր ուսումնասիրությունները կանեիք»,- բնապահպաններին ասաց Արմեն Նաղդալյանը:

Արմեն Նաղդալյանը Հակոբ Սանասարյանը

«Կանաչների միություն» ՀԿ-ի նախագահ Հակոբ Սանասարյանն այցի առնչությամբ «Հետքին» հայտնեց. «Ես բնապահպանական մեր խմբի այցի հետ կապված՝ նախապես բանակցել էի «Մեթըլ Փրինս Էլ-Թի-Դի» ընկերության գլխավոր տնօրեն Մադլեն Թաշճյանի հետ: Մենք մոտ 10 օր առաջ պետք է գայինք: Տիկին Մադլենն ասաց, որ տոներից հետո գանք»: Իսկ տոներից հետո  ընկերության քմահաճ գլխավոր տնօրենը ԼՀԿ-ի ստորաբաժանումներ բնապահպանների այցը թույլատերու համար Հակոբ Սանասարյանի առջև նոր պահանջ է դրել: Հիմա էլ ասացին՝ չէ, մի գնացեք, եկեք բանակցենք, թե ինչ նպատակով և ինչ իրավունքով եք  գնում Ախթալա: Սա չլսված հարցադրում էր, և այդ տիկինը, ով իրեն հանքատեր է համարում, ավելի լավ է մի քիչ զսպի իրեն և նման հարցեր չտա մարդկանց»:

Ախթալայում բնապահպանների շրջագայության ընթացքում ընկերության  հանքերի պետը անվտանգության աշխատողների հետ ընկերությանը պատկանող «Վիլիս» ավտոմեքենայով հետևում և խոչընդոտում էին  բնապահպանների աշխատանքին: Հակոբ Սանասարյանը մեզ հետ զրույցում հայտնեց, որ առաջին անգամ չէ Ախթալայում. «Եթե մարդկանց հնարավորություն է տրվել կողոպտել ժողովրդին, այն էլ՝ օրենքի շրջանակներում, նրանք կողոպտում և լկտիանում են»,- ասաց գիտնականը:  Բնապահպանների աշխատանքին խորընդոտելու՝ ԼՀԿ-ի գլխավոր տնօրենի հանձնարարությունը բնապահպանը համարեց մարդու իրավունքների ոտնահարում: Նրա խոսքով՝ այլ երկրում դրա համար հանքարդյունաբերողը կպատժվեր: 

Այդուհանդերձ, պարոն Սանասարյանը հանցագործություն համարեց Շամլուղի բաց հանքի շահագործումը: Նա ասաց, որ Հայաստանում կա  ուրանի հանքայնացման երևակումների քարտեզ, և այնտեղ հստակ Շամլուղի բաց հանքը մտել է որպես ուրանացված հանք: «Ես չեմ ասում՝ այնտեղ  ուրանի հանք կա, բայց հանքը քարտեզում նշված է,- ասաց պարոն Սանասարյանը և հավելեց, որ Ախթալա իր այցի նպատակն է ուսումնասիրել, թե հանքավայրում կա՞ն ուրանային հետքեր:- Պետք է տեսնեինք՝ այնտեղ անալիտիկ ուսումնասիրություններ կատարվե՞լ են, թե՞ ոչ»:

Կանաչների միության նախագահը ափսոսանք հայտնեց ԼՀԿ-ի կողմից Ախթալա գետակի անվերջ շարունակվող պոչանքային աղտոտումների կապակցությամբ: Անդրադառնալով Ճոճկանի պոչամբարի վիճակին՝ Հակոբ Սանասարյանն անթույլատրելի համարեց երկու բնակավայրերի` Մեծ Այրում և Ճոճկան համայնքների արանքում, գետի  հունի վրա պոչամբար տեղադրելը. «Դա կարող է անել միայն հանցագործը, թող հանեն, տեղափոխեն մեկ այլ տեղ»: «Հետքի» հարցին, թե որքանո՞վ է թույլատրելի պոչամբարի տեղափոխումը, պարոն Սանասարյանը պատասխանեց. «Ճիշտն ասած`դա այդքան էլ խրախուսելի չէ: Իհարկե, սա անլուծելի խնդիր է»:

Անդրադառնալով Ախթալայի բնապահպանական վիճակին՝ Հակոբ Սանասարյանը հանցագործություն որակեց նաև դեռևս 2000թ. ԼՀԿ-ի նախկին գլխավոր տնօրեն Սերոբ Տեր-Պողոսյանի կողմից ընկերության երկու պոչամբարների բեռնաթափումը և դրանք Ախթալա գետակի բերանին և Ախթալա-Մեծ Այրում մինչհամայնքային ճանապարհաեզրին կուտակելը: «Իհարկե, չի կարելի այս տարածքը համեմատել Քաջարանի և Սյունիքի հետ, որտեղ ընդհանրապես մահվան դաշտ է, բայց եթե «Մեթըլ Փրինսը» այսպես շարունակի, 4-6 տարի հետո այս տարածքը նույնպես կարող է վերածվել մահվան դաշտի, եթե չկանխվի»,- ասաց Հակոբ Սանասարյանը:


Մեկնաբանություններ (1)

haykUS
We should throw Madlen Tashyan and his pedofil husban out of the country and give Achtala back to people of Armenia. Diaspora Armenias also can be crooks, and we should get rid of them.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter