ՀՀ փոխվարչապետ, տարածքային կառավարման նախարար Արմեն Գեւորգյանի մոտ այսօր կայացած խորհրդակցությանը քննարկվեցին Եվրոպայի խորհրդում Հայաստանի նախագահության ընթացքում տարածքային կառավարման եւ տեղական ինքնակառավարման ոլորտներում նախատեսվող միջոցառումների կազմակերպչական հարցեր:

Հունիսի 18-ին Երեւանում տեղի կունենա Եվրոպայի խորհրդի տեղական եւ տարածաշրջանային իշխանությունների կոնգրեսի բյուրոյի նիստը, որին նախատեսվում է Կոնգրեսի նախագահ Հերվիգ վան Ստաայի, Կոնգրեսի երկու` տեղական իշխանության եւ տարածաշրջանների պալատների նախագահների ու ներկայացուցիչների մասնակցությունը:

Հաջորդ օրը` հունիսի 19-ին կկայանա «Մասնակցային ժողովրդավարությունը տեղական մակարդակում» թեմայով միջազգային համաժողով, որի ընթացքում կկազմակերպվեն քննարկումներ` «Արդյոք այսօր տեղական ժողովրդավարությունը հնարավոր է առանց ուղիղ մասնակացության», «Մասնակցային մոդել. ուղիղ եւ ներկայացուցչական ժողովրդավարության միավորում», «Էլեկտրոնային ժողովրդավարություն. քաղաքացիական մասնակացության նոր ձեւեր» թեմաներով:

Փոխվարչապետը կարեւորեց, որ միջոցառմանը, բացի Կոնգրեսի բյուրոյի նիստի մասնակիցներից, հրավիրվեն նաեւ միջազգային եւ տեղական փորձագետներ, հայաստանյան ոլորտային հասարակական կազմակերպությունների, շահագրգիռ կառույցների ներկայացուցիչներ:

Քննարկվեցին նաեւ աշնանը Երեւանում նախատեսվող ԵԽ անդամ երկրների մայրաքաղաքների ղեկավարների հանդիպման նախապատրաստման եւ անցկացման հարցեր: Փոխվարչապետը կարեւորեց, որ ՀՀ արտաքին գործերի նախարարության եւ Երեւանի քաղաքապետարանի ներկայացուցիչներն արդեն սկսեն նախապատրաստական աշխատանքները եւ գործընկերների հետ համաձայնեցնեն հանդիպման ծրագիրն ու օրակարգը:

Խորհրդակցությանը քննարկվեցին նաեւ այս տարվա հոկտեմբերին Ֆրանսիայի Վալանս քաղաքում կայանալիք ապակենտրոնացված համագործակցության հայ-ֆրանսիական երկրորդ համաժողովի նախապատրաստական աշխատանքների հետ կապված հարցեր:

ՏԿՆ հասարակայնության հետ կապերի բաժին